ირანი და რუსეთი სარაკეტო სისტემების С-300-ის მიწოდებაზე შეთანხმდნენ.

„დოიჩე ველეს“ ინფორმაციით, ამის შესახებ ირანის საგარეო საქმეთა მინისტრის მოადგილემ, ჰუსეინ ამირ აბდოლაჰიანმა განაცხადა.

აღსანიშნავია, რომ რუსეთის საგარეო საქმეთა სამინისტრომ ინფორმაცია არ დაადასტურა. სამინისტროს მიერ გავრცელებულ განცხადებაში მხოლოდ ხაზგასმულია რუსეთ-ირანის რეგულარული დიალოგის მნიშვნელობა.

შეგახსენებთ, 2005 წელს, რუსეთი ირანისთვის მინიმუნ 5 საჰაერო-საზენიტო სარაკეტო სისტემის С-300-ის მიყიდვას დათანხმდა, რომლის ღირებულება 800 მლნ აშშ დოლარს აღემატება. თუმცა, 2010 წელს ირანის ბირთვული პროგრამის წინააღმდეგ დაწესებული სანქციების გამო, შეთანხმება შეჩერდა, რის გამოც რუსეთს ირანისთვის 166.8 მილიონი დოლარის გადახდა მოუწია. წელს კი მოლაპარაკებები კვლავ განახლდა.

ამერიკის შეერთებულმა შტატებმა არაერთხელ განაცხადა, რომ ირანისთვის С-300-ის გადაცემა დაუშვებელია.

С--300 საზენიტო სარაკეტო სისტემაა, რომლის დახმარებითაც ერთდროულად რამდენიმე სამიზნის განადგურება და რაკეტების ჩამოგდებაა შესაძლებელი.