ჟურნალისტი ირაკლი კორძაია საქართველოდან წასვლის მიზეზებს განმარტავს და ამბობს, რომ ბოლო პერიოდში მასზე გარკვეული ზეწოლა ხორციელდებოდა.

როგორც ტელეკომპანია „მაესტროს“ ეთერში კორძაიამ განმარტა, მის მიმართ ზეწოლა ბესიკ ხარძიანის მკვლელობის შემდეგ დაიწყო.

„პროკურატურა აკეთებს ყველაფერს იმისთვის, რომ საზოგადოებამ ეს თემა მიივიწყოს. ხარძიანის მკვლელობის შემდეგ ჩემს მიმართ ზეწოლის მრავალსახეობა განხორციელდა. ერთ-ერთს ადგილი ჰქონდა ხარძიანის მკვლელობიდან ორი დღის შემდეგ. ამ ყველაფერში ბუნებრივია, ჩართულია უშუალოდ გიორგი უდესიანი, პრემიერ-მინისტრის ნათესაობა, პროკურატურა და ყველა ის მანქანები, რაც მათ ხელთ გააჩნიათ. კონკრეტიკისგან დღეს თავს შევიკავებ, თუმცა გპირდებით, რომ უახლოეს დღეებში ყველაფერს დეტალუარდ გიამბობთ. რაც შეეხება ზეწოლის კონკრეტულ ეპიზოდს ხარძიანის მკვლელობიდან მეორე დღეს ერთ-ერთმა მაღალჩინოსანმა დამირეკა და შეხვედრა მთხოვა. შეხვედრა ბელისნკის ქუჩაზე კაფე „რუმსში“ შედგა. ჩვეულებრივ გვამის გაყიდვას მთავაზობდნენ სიჩუმის სანაცვლოდ. მე უნდა გამეყიდა ბესო ხარძიანის გვამი, სიჩუმის სანაცვლოდ. ვისგან მოდიოდა ეს შემოთავაზება, ძნელი მისახვედრი არ არის, რადგანაც ბრალდებებს უშუალოდ ბესო ხარძიანის მთავარ მტერს და იმ ადამიანებს ვუყენებდი, რომლებიც უშუალოდ გიორგი უდესიანს მფარველობდნენ. ეს ადამიანები პრემიერ-მინისტრი და მისი ნათესავები არიან“, - განმარტა ირაკლი კორძაიამ.

ირაკლი კორძაიამ საქართველო გასულ კვირას დატოვა, ის ბერლინში გაემგზავრა.