მოსამართლეები მაკონტროლებელი ინსპექტორის შესაძლო დანიშვნას ზეწოლად აფასებენ

სამართალი - 20:46, 23 May, 2015

2085

მოსამართლეთა გაკონტროლებასთან დაკავშირებული კანონპროექტის გამო, მოსამართლეთა ნაწილი ნინო გვენეტაძეს უპირისპირდება. კანონპროექტი სპეციალური ინსპექტორების მხრიდან მოსამართლის გაკონტროლებას ითვალისწინებს. ინსპექტორის დამოუკიდებელი ინსტიტუტი იუსტიციის უმაღლესი საბჭოს ბაზაზე იარსებებს.

როგორც მოსამართლეები აცხადებენ თუ ინსპექტორს მათი დაბარების და ახსნა-განმარტების მოთხოვნის უფლება ექნება, ეს სასამართლოზე ზეწოლის სახეს მიიღებს.

„ამ კანონპროექტში მთავარი არის, რომ ზეგავლენა მოახდინონ მოსამართლეებზე გადაწყვეტილების მიღებისას. მექმნება შთაბეჭდილება, რომ ეს ინსპექტორი, რომელიც არის ფაქტობრივად გენინსპექცია, რომელსაც შეუძლია, მოსამართლე დაიბაროს, ჩამოართვას ახსნა-განმარტებები და ა.შ. მითუმეტეს, როდესაც საუბარი ეხება 3-წლიანი გამოსაცდელი ვადით მოსამართლეების დანიშვნას, რომელსაც ისედაც ამოწმებს საბჭო, ასევე შეამოწმებს ინსპექტორი, რაც ვფიქრობ, დაუშვებელია,“ - განაცხადა იუსტიციის უმაღლესი საბჭოს მდივანმა, ლევან მურუსიძემ.

არასამთავრობო ორგანიზაციების წარმომადგენლების შეფასებით, კანონში ნათლად უნდა იყოს განმარტებული ინსპექტორის ფუნქცია-მოვალეობები და მათი მხრიდან მოსამართლეებზე ზეწოლის შესაძლებლობები უნდა გამოირიცხოს.

ცვლილებათა პაკეტის სამუშაო ვერსიაზე დღეს მართლმსაჯულების სახლში იმსჯელეს. მსჯელობას უზენაესი სასამრთლოს თავმჯდომარე ნინო გვენეტაძეც ესწრებოდა. საჯარო განხილვები მომდევნო თვეს ისევ თბილისში, ბათუმში და ყვარელში იგეგმება.