ადამიანის უფლებათა დაცვის ორგანიზაცია, Amnesty International-ი უკრაინის კონფლიქტში მონაწილე ორივე მხარეს ტყვეების წამებასა და მკვლელობაში ადანაშაულებს.

36 გვერდიანი ანგარიშის მიხედვით, საბრძოლო მოქმედებების დროს ტყვედ ჩავარდნილ ჯარისკაცებს ორივე მხარე ფიზიკურ შეურაცხყოფას აყენებს, აწამებენ ელექტროშოკებით, სცემენ, ცივი იარაღით ჭრილობებს აყენებენ, ემუქრებიან და სამედიცინო დახმარებით არ უზრუნველყოფენ.

ანგარიში, დონეცკისა და ლუგანსკის სეპარატისტების ტყვეობაში მყოფ 17 სამხედროსა და უკრაინის არმიის წარმომადგენელთა ტყვეობაში მყოფი 16 პატიმრის ჩვენებას ეფუძნება.

საერთაშორისო ორგანიზაციის ანგარიშის მიხედვით, ადამიანების დაკავება მათი შეხედულებებისა და კონკრეტული მხარის მიმართ გამოხატული სიმპატიის გამოც ხდება.