გურამ შარაძის მკვლელობის ადგილზე მისი ოჯახის წევრები და მეგობრები შეიკრიბნენ. გარდაცვლილის ოჯახი დარწმუნებულია, რომ საქმეზე ბრალდებული გიორგი ბარათელი უდანაშაულოა.

გარდაცვლილის შვილის რუსუდან შარაძის ინფორმაციით, საქმის ხელახალი გამოძიება უკვე დაიწყო და ამ დღეებში ოჯახის წევრები მთავარი პროკურორის მოადგილესთან ირაკლი შოთაძესთან შეხვედრასაც აპირებენ.

„ამ დღეებში ირაკლი შოთაძესთან ვაპირებ შეხვედრას. ვიცი, რომ მოწმეების დაკითხვა მიმდინარეობს და ახალი მტკიცებულებებიც გაჩნდა. ამ დროისთვის საქმის დეტალებზე საუბარი არ შემიძლია. ამის შესახებ შოთაძესთან შეხვედრის შემდეგ ვისაუბრებ. რაც შეეხება გიორგი ბარათელს, ჩემი ინფორმაციით ის ისევ პატიმრობაში რჩება. ბარათელს რამდენიმე ამნისტია შეეხო და დაახლოებით 2 წელი აქვს დარჩენილი, თუმცა იმედი მაქვს, რომ საქმის გამოძიება მალე დასრულდება“, - განაცხადა შარაძემ.