,,ადამიანი წავიდა კოსმოსში, შეისწავლა ბუნება, გადადგა დიდი ნაბიჯები მეცნიერებასა და ტექნიკაში, თუმცა, თითქმის ვერაფერი გააკეთა საკუთარი თავის შეცნობაში. ძველი ფილოსოფოსები ამბობდნენ - ,,შეიცან თავი შენი". როცა ჩვენს თავს ვუყურებთ, თითქოს უფრო შორს მიდის ჩვენგან, იმის მაგივრად, რომ დრო გადის, წლები გვემატება და უკეთ ვიცნობდეთ ერთმანეთს და, მათ შორის, საკუთარ თავს, თუმცა, ადამიანი უფრო სუსტდება და ნაკლებად ფიქრობს თავის შეცნობაზე", - ბრძანა უწმინდესმა.

ილია მეორემ დღევანდელ საკვირაო ქარაგებაზე საკუთარი თავის შეცნობისა აუცილებლობაზე გაამახვილა ყურადღება. უწმინდესმა მრევლს სიმართლის მნიშვნელობაზეც უქადაგა.

,,ბიბლიაში ვკითხულობთ ,,შეიყვარე სიმართლე და მოიძულე ურჯულოება". ამის თქმა იოლია, თუმცა, შესრულება ძალიან მძიმეა. ბოლომდე ადამიანი ვერ გაიგებს იმას, სად არის სიმართლე. სიმართლე შეიძლება შენს გვერდით იყოს და შენ ეძებდე სადღაც შორის. შეიძლება შორს იყოს და შენ ეძებდე შენს გარშემო. მხოლოდ უფალს შეუძლია გახსნას შენი გონება, ჩვენი თვალი სულიერი და დავინახოთ და შევიყვაროთ სიმართლე. ბევრი შემთხვევაა, როცა უსჯულოებას ვაკეთებთ და არ გვგონია ეს უსჯულოება. ვთხოვოთ უფალს, რომ გარდა ფიზიკური გონებისა, მოგვცეს ჩვენ დიდი გონება - სულიერი", - ბრძანა პატრიარქმა.