ნაფიც მსაჯულებთან დაკავშირებით ახალი რეგულაციები წესდება

სამართალი - 16:24, 19 May, 2015

1301

„სისხლის სამართლის საპროცესო კოდექსში“ ცვლილებები შედის, რომლის მიხედვითაც, ნაფიც მსაჯულთა შერჩევის მეორე ეტაპზე 18 წელს მიღწეულ პირთა ერთიანი სიიდან, 30 კანდიდატის ნაცვლად, მსაჯულობის 100 კანდიდატი შეირჩევა. გარდა ამისა, თუ წარდგენილი ბრალდება სასჯელის სახით უვადო თავისუფლების აღკვეთას ითვალისწინებს, თითოეული მხარე, ნაცვლად 12 დაუსაბუთებელი აცილებისა, 10 დაუსაბუთებელი აცილების განცხადების უფლებით ისარგებლებს.

ასევე ამ ინიციატივის თანახმად, რომლის ავტორიც დეპუტატი გედევან ფოფხაძეა. ნაფიც მსაჯულთა შერჩევის სხდომაზე მოსამართლეს შესაძლებლობა ეძლევა, შეკითხვის დასასმელად და დასმულ შეკითხვაზე პასუხის გასაცემად მხარეებსა და მსაჯულობის კანდიდატებს გონივრული ვადა განუსაზღვროს.

როგორც ფოფხაძე განმარტავს, სასამართლო პრაქტიკის განზოგადების შედეგად ირკვევა, რომ სასამართლო პროცესის გაჭიანურება ხშირ შემთხვევაში ნაფიც მსაჯულთა შერჩევის პროცესის სირთულითა და მისი არაგონივრული გაჭიანურებითაა განპირობებული.

„ნაფიც მსაჯულთა შერჩევის პროცედურა დაახლოებით 5-დან 8-მდე შერჩევის სხდომას საჭიროებს და ერთ თვეზე უფრო ხანგრძლივ პერიოდს მოიცავს, რაც უარყოფით გავლენას ახდენს ასევე ნაფიც მსაჯულთა მოტივაციასა და მიუკერძოებლობაზე“, - აღნიშნავს ფოფხაძე.