ე.წ. კორტების სპეცოპერაციის საქმეში ბრალდებული, შსს-ს ყოფილი თანამშრომელი გიორგი ცააძე თავს უდანაშაულოდ თვლის და ამბობს, რომ ამის დამტკიცება წუთნახევარში შეიძლება.

ამის შესახებ ცააძემ დღევანდელ პროცესზე განაცხადა.

მისი თქმით, ბრალდება, რომ მან საკონტროლო გასროლა გააკეთა აბსურდულია და ეს ვიდეოფირშიც ჩანს, სადაც სპეცოპერაციაა გადაღებული.

„თუ შეიძლება ჩავრთოთ ფირი. დამაწყდა ნერვები. ცააძე ვარ, ვიღაც ღობეგლეჯიაშვილი ხომ არ ვარ? ეს სამი მოწმე ორ კაცს გვადებს ხელს. მე თითქოს ვისროლე საკონტროლო ტყვია და თაბაგარმა თითქოს ჩადო იარაღი. სპეცოპერაციაზე თაბაგარი საერთოდ არ ყოფილა. პროკურატურამ ის დაკითხა და გაუშვა“, - განაცხადა ცააძემ.

საქალაქო საამართლოში დღეს ე.წ. კორტების სპეცოპერაციის საქმის განხილვა გაიმართა. პროცესზე რამდენიმე ინციდენტი მოხდა. ერთმანეთს სიტყვიერად ბრალდებულები და ვაზაგაშვილის ოჯახის წევრები დაუპირისპირდნენ.

შეგახსენებთ, ე.წ კორტების სპეცოპერაციის საქმეზე განზრახ მკვლელობის, მტკიცებულებათა ფალსიფიკაციის და განზრახ უკანონო დაკავების ბრალდებებით 2 თებერვალს 11 პირი დააკავეს. მათ შორის პოლიციის ყოფილი მაღალჩინოსნები და სპეცრაზმის წევრები არიან.