დაკითხვიდან გამოსული გიგი უგულავა შეცდომად მიიჩნევს იმ ფაქტს, რომ არც ერთი პოლიციელი სამების მოედანზე არ იმყოფებოდა და იქ მყოფი პირები არ იყვნენ გაფრთხილებული, ეროვნულ ბიბლიოოთეკაში ალტერნატიული შესასვლელის არსებობის შესახებ.

,,ეს მიმაჩნია შეცდომად. რატომ არ იყო კორდონი სამების მოედნისა და ფურცელაძის ქუჩიდან, თუ იქ არსებობდა ალტერნატიული შესასვლელი. რატომ არ გაკეთდა კორდონი პოლიციელების მხრიდან, რომ მოძალადე მხარეს გადმოსვლის საშუალება არ ჰქონოდა და არ მომხდარიყო ის დარბევა, რაც მოხდა. ამაზე პასუხი არ არის ისევე, როგორც იმაზე, დაიკითხება თუ არა მოჩურჩულე ნანა კაკაბაძე. დაკითხვაზე დეტალურად აღვწერეთ ის პროცესები, რაც საზოგადოებისთვის უკვე ცნობილია და გადაღებულია არაერთი რაკურსით", - განაცხადა გიგი უგულავამ.

თბილისის მერმა იმ დეტალებზეც ისაუბრა, რომელიც მისი მხრიდან გაკეთებული შეძახილების მიზეზად იქცა: 
,,ვანიშნებდი დეპუტატებს, რომ ერთად გვევლო, რათა ინდივიდუალური თავდასხმები თავიდან აგვეცილებინა. რაც შეეხება სიტყვა ,,შოუს"", რომელიც ღარიბაშვილმა იაფფასიანი მანიპულირებისთვის გამოიყენა, ეს სიტყვა კონკრეტულ კონტექსტში ვთქვი, კერძოდ, როდესაც კვერცხების სროლა და ლანძღვა მიდიოდა, უსაქმოდ მდგომ პოლიციელებს შევახსენე, რომ წესრიგი უნდა დაემყარებინათ. შემდეგ ერთ კონკრეტულ პირს ვუთხარი, თუ შოუ გინდათ – აგერ თქვენი შოუ-მეთქი", - განაცხადა გიგი უგულავამ.

თბილისის მერი აცხადებს, რომ თუ საჭირო გახდება, ის კვლავ მზად არის გამოძიებასთან ითანამშრომლოს. თუმცა უგულავა ვარაუდობს,რომ 8 თებერვლის ინციდენტზე მისი დაკითხვა აღარ მოხდება. შეგახსენებთ, რომ თბილისის მერის დაკითხვა 8 თებერვალს, საჯარო ბიბლიოთეკასთან განვითარებულ მოვლენებს უკავშირდებოდა. გიგი უგულავა დღეს ძველი თბილისის რაიონულ სამმართველოში დაკითხვაზე 13:00 საათზე მივიდა.