კორტების სპეცოპერაციის საქმეზე ბრალდებული ირაკლი ფირცხალავა ინტერესდება, თუ რატომ გამოიყო ცალკე წარმოებად ხუთი სპეცრაზმელის საქმე.

ამის შესახებ მან ე.წ. კორტების სპეცოპერაციის საქმეზე გამართულ პროცესზე განაცხადა და პროკურატურა მოწმეების მოსყიდვაში დაადანაშაულა.

მისი ინფორმაციით, პროკურატურამ ბონდო ფუთურიძის და ედუარდ სიდოაინის მეშვეობით მოწმეები მოისყიდა.

„დღეს გვაქვს კომიკური სიტუაცია. ერთი და იგივე სისხლის სამართლის საქმეზე 2 სასამართლო დარბაზია და 2 მოსამართლეა. ვის მივმართო ამასთან დაკავშირებით, შოთაძეს თუ გაურკვეველი მენტალიტეტის მქონე იუსტიციის მინისტრს, რომელიც პიკანტურ ფოტოებს აქვეყნებს ქურდული სამყაროს წარმომადგენლებთან. ამასთან დაკავშირებით, მინდოდა მიმემართა სახალხო დამცველისთვის, მაგრამ კომუნიკაცია არ შემდგარა. ასევე მინდოდა არასამთავრობოებისთვის მიმემართა, მაგრამ არ მინდა მოსასმენი მოწყობილობები ჩემი პჯახის წევრების სახლებსა და ოფისებში. ბესელიასთვის მინდოდა მიმემართა, მაგრამ გამახსენდა, რომ ბევრი ქურდს ადვოკატია. ერთადერთი იმედი დამრჩა, რომ ჟურნალისტებს მივმართო და გავაგებინო ჩემი პოზიცია ამ კომიკური სიტუაციის შესახებ“, - განაცხადა ფირცხალავამ.

შეგახსენებთ, საქალაქო სასამართლოში ე.წ. კორტების სპეცოპერაციის საქმეზე პროცესი მიმდინარეობს.