კაბელების საქმეზე პროკურატურა სამართლებრივ ჩიხშია- ლევან სამუშია

სამართალი - 20:03, 15 May, 2015

1677

ე.წ. კაბელების საქმეზე, თავდაცვის სამინისტროს ყოფილი მაღალჩინოსნების ადვოკატის ლევან სამუშიას განცხადებით, პროკურატურა სამართლებრივ ჩიხშია შესული. სამუშიას თქმით, პროკურატურა ამ ჩიხიდან გამოსვლას ვერ მოახერხებს, რადგან დანაშაული არ მომხდარა და არც მტკიცებულებები არსებობს.

„რაც არ მომხდარა, იმის მტკიცებულებებს ვერ წარმოადგენენ. ჩვენი დასკვნის თითეული ხაზი კი უტყუარ მტკიცებულებას შეიცავს“, - განაცხადა სასამართლო სხდომის დასრულების შემდეგ ადვოკატმა ლევან სამუშიამ.

თბილისის საქალაქო სასამართლოში ე.წ. კაბელების საქმეზე დღეს დახურული სხდომა გაიმართა, სადაც პროკურატურამ დამატებითი მტკიცებულებები წარმოადგინა, მათ შორის "სილქნეტიდან" მიღებული ინფორმაცია და ექსპერტიზის დასკვნა.

დაცვის მხარე პროკურატურის მიერ წარმოდგენილ მტკიცებულებებს ფარატინა ფურცელს უწოდებს და უნდობლობას უცხადებს. მათი თქმით პროკურატურას წარმოდგენილი მტკიცებულებები კანონის დარღვევით აქვთ მოპოვებული და ადვოკატები მოსამართლისგან მათ უსაფუძვლოდ ცნობას მოითხოვენ.

„სასამართლომ ჩვენი შუამდგომლობები უნდა დააკმაყოფილოს, კერძოდ, ბრალის დადგენილებისა და ექსპერტიზის დასკვნის დაუშვებლად ცნობა, რომელიც ვერანაირ სამართლებრივ კრიტიკას ვერ უძლებს“ - აცხადებს ადვოკატი.

მისივე ინფორმაციით, პროკურატურის მიერ წარმოდგენილი დამატებითი მასალების გაცნობისა და დაცვის მხარის არგუმენტების მოსმენის შემდეგ, მოსამართლე თავის დასკვანს მომდევნო სასამართლო სხდომაზე გამოაცხადებს. სხდომის თარიღს კი მხარეებს დამატებით აცნობებენ.

თავდაცვის სამინისტროს მოქმედი თანამდებობის 5 პირი, 4 მილიონ ლარზე მეტი საბიუჯეტო თანხების გაფლანგვის ბრალდებით, 2014 წლის 28 ოქტომბერს დააკავეს. გამოძიების ინფორმაციით, თავდაცვის სამინისტრომ საიდუმლო შესყიდვა გამოაცხადა. სამინისტროს მაღალჩინოსნებმა კომპანია „სილქნეტი“ პრივილეგირებულ მდგომარეობაში ჩააყენეს და მომსახურებაში, რომელიც, პროკურატურის შეფასებით, 2 მილიონი ლარის ღირებულებისაა, „სილქნეტმა“ 6 მილიონი ლარი მიიღო.