ლაშა მახარაძის მკვლელობის დეტალები - რას ჰყვება საქმის მთავარი მოწმე

სამართალი - 14:36, 14 May, 2015

1936

ლაშა მახარაძის საქმეში ბრალდებული ლევან ბერძენიშვილი გასული წლის სექტემბერში მომხდარ ფაქტს იხსენებს და ადასტურებს, რომ ლაშა მახარაძეს გიორგი ოქროპირიძემ ცეცხლსასროლი იარაღიდან ესროლა.

ბერძენიშვილმა სასამართლო ჩვენებაზე გაიხსენა, რომ მკვლელობის დღეს საკუთარი მანქანით „ოქრიკასთან“ ერთად რამდენიმე ადგილას იმყოფებოდა, საღამოს კი ლაშა მახარაძე ნახეს.

როგორც ბერძენიშვილი ამბობს, სიტყვიერი დაპირისპირება ლაშა მახარაძესა და გიორგი ოქროპირიძეს შორის იმ დღეს არ მომხდარა. თუმცა მან გაიხსენა რამდენიმე წლის წინ მომდხდარი ფაქტი და განაცხადა, რომ ფიზიკურ დაპირისპირებას „ოქრიკას“ და მახარაძეს შორის მაშინ ადგილი ჰქონდა. რა იყო დაპირისპირების მიზეზი, ბერძენიშვილი ვერ აკონკრეტებს.

„როდესაც მახარაძესთან მივედით, ლაშა მახარაძემ უთხრა „ოქრიკას“ მანქანიდან რატომ მელაპარაკები გადმოდიო. ჩვეულებრივი ლაპარაკი. მანქანიდან გადასვლას ვაპირებდით, გავიგე კარის გაღების ხმა, რა დროსაც გავიგე გასროლაც...“, - განაცხადა ბერძენიშვილმა.

შეგახსენებთ, ვაკეში მკვლელობა გასულ წელს, აბაშიძის ქუჩაზე, 2 სექტემბერს მოხდა. გამოძიების ინფორმაციით გიორგი ოქროპირიძემ ცეცხლსასროლი იარაღიდან გასროლით რამდენიმე ჭრილობა მიაყენა ლაშა მახარაძეს, რომელიც საავადმყოფოში მიყვანისთანავე გარდაიცვალა.

ოქროპირიძე რამდენიმე დღეში ოკუპირებული ცხინვალის რეგიონის ტერიტორიაზე დააკავეს.