,,ყველა მითხრა, ეს იყო ოქრიკაო... “ - ლაშა მახარაძის დედამ შვილის მკვლელობის დღეს დეტალურად გაიხსენა

სამართალი - 20:19, 13 May, 2015

4373

ლაშა მახარაძის მკვლელობის საქმის განხილვა მიმდინარეობდა დილიდან საქალაქო სასამართლოში. გიორგი ოქროპირიძის ბრალეულობის საკითხი ნაფიცმა მსაჯულებმა უნდა გადაწყვიტონ. სასამართლოს ჩვენება პირველმა ლაშა მახარაძის დედამ ნინო დიდებულიძემ მისცა. ჩვენება დაახლოებით ნახევარ საათს გაგრძელდა. სამუშაო საათების დასრულების გამო მოსამართლემ დაკითხვა ხვალისთვის გადადო.

ნინო დიდებულიძემ მომხდარი დეტალურად გაიხსენა. გარდაცვლილის დედამ ჰყვება, რომ მისი შვილის მკვლელობის ღამეს, ყველამ უთხრა, რომ დანაშაული გიორგი ოქროპირიძემ ჩაიადინა. ნინო დიდებულიძე ამბობს, რომ ბრალდებული მას ერთხელ ჰყავს ნანახი, მაშინ, როცა მისმა შვილმა ოქროპირიძე ციხიდან გამოსვლის შემდეგ გააცნო. ნინო დიდებულიძემ მისი ოჯახის ტრაგედიაზეც ისაუბრა და აღნიშნა, რომ მას შემდეგ, რაც უფროსი შვილი თენგიზ მახარაძე, მისი მეუღლე, რძალი და შვიდი წლის შვილი ავტოკატასროფაში დაეღუპა, ლაშა ერთადერთი იმედი იყო.

,,2014 წლის 2 სეტემბერს ჩვეულებრივი დღე გათენდა. თურმე რას გვიმზადებდა ღმერთი თუ სატანა. ლაშა მოვიდა 18:30 საათზე და მითხრა, დაბადების დღეზე მივდივარ, 20 ლარი მომეციო. მეც მივეცი, სუნამო დაისხა და გავიდა. მე ახლობელთან წავედი, ავად იყო და ეზოში ვსაუბრობდით, როცა ატყდა ჩოჩქოლი, ვერ მივხვდი, რა ხდებოდა, გამოვიდა ჩემი ახლობლის შვილი და მითხრა, ლაშა ფეხშია დაჭრილიო. ეს იყო შოკი. 4 დღის წინ იყო წლისთავი იმ უბედურებისა, რაც მე თავს დამატყდა. შიშმა ამიტანა, ბევრჯერ ყოფილა შემთხვევა, როცა ფეხში დაჭრილი საავადმყოფოში ცოცხალი ვერ მიუყვანიათ.

რესპუბლიკურ საავადმყოფოს რომ მივუახლოვდი ეზო იყო გადაჭედილი, ძალიან ბევრი ხალხი იყო. ლაშას ამხანაგები, ნათესავები, მთელი თბილისი იყო... ვინ უნდა ყოფილიყო თქო და იმ წუთას ყველამ ერთად, ეს იყო გიორგი ოქროპირიძე, ოქრიკაო. ჩემთვის შოკი იყო, მას არ ვიცნობდი ასე კარგად. რისთვის-თქო, - ვიკითხე. მე არ მეგულებოდა ადამიანი საქართველოში, ვინც ამ მდგომარეობაში, ამხელა ტრაგედიის შემდეგ ხელს აწევდა ჩემ შვილზე. ასეთი ბოროტმოქმედი მე საქართველოში არავინ მეგულება“, -განაცხადა ნინო დიდებულიძემ.

რაც შეეხება თავად მკვლელობაში ბრალდებულს, ის თავს დამნაშავედ არ სცნობს.

შეგახსენებთ, ვაკეში მკვლელობა გასულ წელს, აბაშიძის ქუჩაზე, 2 სექტემბერს მოხდა. გამოძიების ინფორმაციით გიორგი ოქროპირიძემ ცეცხლსასროლი იარაღიდან გასროლით რამდენიმე ჭრილობა მიაყენა ლაშა მახარაძეს, რომელიც საავადმყოფოში მიყვანისთანავე გარდაიცვალა.

ოქროპირიძე რამდენიმე დღეში ოკუპირებული ცხინვალის რეგიონის ტერიტორიაზე დააკავეს.