ცნობილი ამერიკელი ჟურნალისტი, სეიმურ ჰერში აშშ-ის მთავრობას „ალ-ქაიდას“ ლიდერის, ოსამა ბინ ლადენის გარდაცვალების გარემოებების დამახინჯებაში ადანაშაულებს.

ჟურნალისტის თქმით, ბინ ლადენი პაკისტანში არ იმალებოდა, როგორც ამას აშშ-ის ხელისუფლება აცხადებს, არამედ ადგილობრივი დაზვერვის მიერ იყო დაპატიმრებული და „ალ-ქაიდაზე“ ზეწოლის ბერკეტად გამოიყენებოდა. მისი თქმით, 2006 წლიდან ბინ ლადენი, საუდის არაბეთის ფინანსური მხარდაჭერით პაკისტანის კონტროლქვეშ აბუტაბადეში იმყოფებოდა.

ჰერშის მტკიცებით, აშშ-ის ხელისუფლებას ბინ ლადენის ადგილმდებარეობის შესახებ ინფორმაცია პაკისტანის დაზვერვის ოფიცერმა მიაწოდა, რისთვისაც მან 25 მილიონი დოლარი მიიღო.

ამერიკის შეერთებული შტატბის ოფიციალური ვერსიით, ბინ ლადენი 2011 წლის 2 მაისს სპეცოპერაციის დროს მოკლეს, რის შემდეგაც „ალ-ქაიდას“ ლიდერის გვამი არაბეთის ზღვაში ჩაძირეს. ჟურნალისტის თქმით კი, ბინ ლადენის ცხედარი, თავში რამდენიმე ნატყვიარით ვერტმფრენიდან ჰინდუკუშის მთებში ჩამოაგდეს.

სეიმურ ჰერშის ბრალდებებზე თეთრ სახლს ოფიციალური განცხადება ჯერ არ გაუკეთებია.

ხატია ლაღიძე