21 წლის ყოფილი პატიმარი: "ბედუკაძე მაწამებდა და მაუპატიურებდა"

სამართალი - 08:55, 14 Feb, 2013

2262

21 წლის ყოფილი პატიმარი ვახტანგი, რომლის ვიზუალური იდენტიფიცირება "რუსთავი2"-მა შეგნებულად შეზღუდა, აცხადებს, რომ გლდანის მე-8 საპყრობილეში ლადო ბედუკაძე და ციხის ორი თანამშრომელი, ვინმე ბასტი და ბუბუ რეგულარულად აწამებდნენ და მასზე სექსუალურად ძალადობდნენ. ყოფილი პატიმრის თქმით, ისინი სხვა მსჯავრდებულებსაც აუპატიურებდნენ.

ყოფილმა პატიმარმა ინტერვიუში ლადო ბედუკაძესთან ურთიერთობის დეტალები გაიხსენა და განაცხადა, რომ ბედუკაძე ჯერ მასთან დაახლოებას ცდილობდა, შემდეგ კი საკნიდან გაიყვანა და საკუთარ კაბინეტში სექსუალური კავშირის დამყარება შესთავაზა, უარის მიღების შემდეგ კი პატიმარი სცემა, ხელბორკილები დაადო და გააუპატიურა.

"რუსთავი2"-მა ვერ მოახერხა, ჩაეწერა ლადო ბედუკაძის კომენტარი ამ ფაქტთან დაკავშირებით, რადგან ის დაცვით გადაადგილდება და გადამღებმა ჯგუფმა ციხის სკანდალური კადრების ავტორთან მიახლოება ვერ შეძლო.

ურთიერთგამომრიცხავ კომენტარებს აკეთებენ ბედუკაძის ადვოკატები: ლალი აფციაურის თქმით, წარმოდგენა არა აქვს, ვინ არის ვახტანგი, ხოლო ელზა ჯმუხაძე აცხადებს, რომ ვახტანგის არსებობისა და მისი პრეტენზიების შესახებ საქმის კურსშია. ჯმუხაძის თქმით, ყოფილი პატიმარი პროვოკატორია:

"დღეს ეს პატიმარი ამბობს, ხვალ ჭიჭიკო ბენდელიანი იქნება... ესენი პროვოკატორები არიან და რაც კეთდება, პიარისთვის კეთდება", - აღნიშნა ელზა ჯმუხაძემ "რუსთავი2"-თან სატელეფონო საუბარში.