გუშინ ლანჩხუთში გამგეობის ყოფილი თანამშრომლის ესე სარჯველაძის დაკავების შემდეგ, დაკითხვაზე გამგებლის მოადგილე ვახტანგ ზენაიშვილი დაიბარეს.

გავრცელებული ინფორმაციის თანახმად, გამოძიებას ზენაიშვილთან კითხვები სარჯველაძის ჩვენების შემდეგ გაუჩნდა, როცა ამ უკანასკნელმა ინდმეწარმისგან აღებული ქრთამის მიმღებად სწორედ გამგებლის მოადგილე დაასახელა.

„გურიის მოამბე" დაუკავშირდა ვახტანგ ზენაიშვილს, რომელიც მომხარში პროვოკაციის ნიშნებს ხედავს, თუმცა არა პოლიტიკური თვალსაზრისით:

"გუშინ რომ აიყვანეს ის სარჯველაძე, გამოძიებას მიაწოდა ასეთი ინფორმაცია, რომ თითქოს ჩემი სახელით მოქმედებდა. გაირკვა საბოლოოდ ის, რომ ინდ მეწარმესთან, ვისაც ეს თანხა გამოართვა, ახსენა ჩემი სახელი, რომ თანხა უნდა გადმოეცა ჩემთვის. რაც არის სრული აბსურდი. არც შეიძლებოდა მსგავსი რამ ყოფილიყო. დაკითხვაზე ვიყავი დაბარებული და ვუთხარი იმათ, რომ ეცალათ ვისთან მიიტანდა სარჯველაძე თანხას და გაერკვეოდნენ ყველაფერში. ამაზე მიპასუხეს, რომ დარწმუნებულები იყვნენ ჩემს სიმართლეში, რომ არაფერ შუაში მე არ ვიყავი და უბრალოდ ეს ადამიანი იყენებდა ჩემს სახელს. არანაირი კითხვები მათ არ დარჩათ ჩემთან.

რაც შეეხება ინდ. მეწარმეს, რომელიც შემოვიდა გამგეობაში, მისი განცხადებით, მას იჯარით სურდა რაღაც მიწის ნაკვეთის აღება, ეს ყველაფერი კანონის სრული დაცვით არის გაკეთებული, ღიად და გამჭირვალედ. იქ რაიმე კითხვები არ არსებობს. არანაირი შეღავათები მისთვის, რაც კანონთან არ მოვიდოდა შესაბამისობაში, არ გაგვიკეთებია და არანაირი საფძველი არ არსებობდა, რომ ამ ადამიანს ვინმესთვის ქრთამი გადაეხადა. ნაკვეთი რომელიც არის 4 ათასი ლარის ღირებულების, არა მგონია რომელიმე ჭკუათმყოფელმა მეწარმემ 2 500 ლარი გადაიხადოს წელიწადში და შეთანხმდეს იმაზე, რომ დამატებით ქრთამი გადაიხადოს 3 ათასი. აქ ლოგიკა არ არსებობს".

აქვს თუ არა ადგილი რაიმე სახის პროვოკაციას მის, როგორც "თავისუფალი დემოკრატების" წარმომადგენლის წინააღმდეგ, გვპასუხობს, რომ ამის ნიშნები იკვეთება:

" ზოგადად პროვოკაციის ნიშნებს ატარებს, ეს ყველაფერი, მაგრამ არა პოლიტიკურს. ივნისის პირველ რიცხვებში მე ამაზე გავაკეთებ ბრიფინგს და გამოვთქვამ ჩემს აზრს"-გვითხრა ზენაიშვილმა.