„ლარის სტაბილურობისათვის სავაჭრო ფონდის მისია იყო ჩამოსული და ერთ-ერთი რჩევა მთავრობისადმი იყო ბიუჯეტის სეკვესტრის განხორციელება და ამით ბიუჯეტის დეფიციტის შემცირება. ვინაიდან მხოლოდ მონეტარული მეთოდებით, ანუ ეროვნული ბანკის ინსტრუმენტებით, ლარის დევალვაციის შემცირება და კრიზისის თავიდან აცილება იყო შეუძლებელი, ასეთი იყო სავაჭრო ფონდის დასკვნა და ამიტომ მთავრობას უნდა განეხორციელებინა სხვადასხვა ღონისძება, მათ შორის სწრაფი ეფექტის მისაღწევად ბიუჯეტის შეკვეცა. შემდეგ მთავრობამ, ამას უწოდა“ ქამრების მოჭერა“, რაც გამოიხატებოდა მხოლოდ ადმინისტრაციული ხარჯების შემცირებით, სინამდვილეში ესეც კი არ განხორციელებულა და ცალკეული სამინისტროების სიმბოლური განცხადება მოვისმინეთ თანხების შესაძლო შემცირები შესახებ, რომლის განხილვა სერიოზულად არც კი ღირს, აქ ლაპარაკია კაპიკებზე - ასე ვთქვათ, ადმინისტრაციული ქამრების მოჭერა ბენზინის მოხმარების შემცირებასა და საკანცელარიო საგნებამდე იქნა დაყვანილი. ის, რომ ბიუჯეტის კორექტირებაზე იფიქრებენ 6 თვის მერე, ეს იმას ნიშნავს რომ ფაქტიურად ნახევარი ბიუჯეტი იქნება დახარჯული და შესამცირებელი არაფერი დარჩება“ - განუცხადა „ნიუპოსტს“ რომან გოცირიძემ.

ექსპერტი მიიჩნევს, რომ „ქართული ოცნების“ წინასაარჩევნო დაპირებები პოპულისტური და არაკომპეტენტური იყო. მისი თქმით, დენის ტარიფის კლება მაკროეკონომიკური გარემოს პროცესის გაუარესებაში, პირველი დიდი და მცდარი ნაბიჯი იყო.

„მთავრობა ბიუჯეტს უყურებს არითმეტიკულად და ამბობს, რომ მიმდინარე ხარჯვა, ნაკლებია ვიდრე შემოსავალი და ბიუჯეტის როლი ლარის დევალვაციაში არის ნული. ეს არის მთავრობის თეზისი, რაც არასერიოზულია. არითმეტიკულად არ შეიძლება შეხედო ბიუჯეტს, თავისთავად ბიუჯეტი არის უკვე ქვეყანაში ფინანსური დესტაბილიზაციის წყარო, უამრავი სუბსიდირებაა - გაზის სუბსიდირებაც კი დაიწყეს. არაეფექტური ბიზნეს თუ სხვა ხარჯები, მთავრობის პოლიტიკური ჩარევა მარეგულირებლის საქმიანობაში - ამით დღეს თუ ხვალ გაკოტრდება ყველა ენერგო კომპანია, თუკი ტარიფები არ შეიცვალა - არ გაიზარდა და მაკროეკონომიკური გარემოს გაუარესების პროცესში. პირველი აგურის გამოსვლა, ამ გაუფასურებაში იყო დენის ტარიფის კლება, არაკომპეტენტური და პოპულისტური საარჩევნო დაპირების შესრულების მიზნით და კიდევ კარგი, რომ ქართული ოცნების წინასაარჩევნო დაპირებების მხოლოდ 5 % შესრულდა, თორემ მისი ნახევარიც რომ შესრულებულიყო დღეს საქართველოს ეკონომიკა და ლარი იქნებოდა სამარეში“ - აღნიშნა რომან გოცირიძემ.

რაც შეეხება გამოსავალს არსებობს ეკონომიკური კრიზისიდან, რომან გოცირიძის თქმით, სწრაფი ეფექტურობიოსთვის აუცილებელია ბიუჯეტის კორექტირება.

„სწრაფი გადაწყვეტილების მიღება შეიძლებოდა 6 თვის წინ, ახლა თავიდან ბოლომდე უნდა მიხედონ ეკონომიკას და დაუბრუნდნენ ეკონომიკის განვითარების სწორ გზას, რაც კი რაიმე შექმნეს სააგენტოები და პროგრამები - ეს ყველაფერი გასაუქმებელია და ნულიდანაა დასაწყები, თუ უნდათ რომ ფუნდამენტური ცვლილებები მოხდეს, ხოლო სწრაფი გადაწყვეტილება არის ბიუჯეტის კორექტირება და ეროვნული ბანკის ფულად-საკრედიტო პოლიტიკის გამკაცრება, რასაც ეროვნული ბანკი თავისმხრივ აკეთებს, თუმცა შესაძლოა ამ პოლიტიკის კიდევ უფრო გამკაცრება - ანუ, ფულის მასის მეტი შემცირება, რაც ეკონომიკური ზრდის შემცირებასა და უმუშევრობას გამოიწვევს, მაგრამ ეს იქნება ნაკლები ბოროტება ვიდრე ის, რაც ლარის დევალვაციით მოსდის სოციალურ და ეკონომიკურ სფეროს“ - აცხადებს რომან გოცირიძე.

რუსუდან ქიმერიძე