სარფის საბაჟოზე და თბილისის აეროპორტში არადეკლარირებული საქონელი აღმოაჩინეს

სამართალი - 15:15, 05 May, 2015

1570

4 მაისს საბაჟო გამშვები პუნქტის „სარფი“-ს ტერიტორიაზე თურქეთიდან საქართველოს ტერიტორიაზე შემოსულ საქართველოს მოქალაქე კ.კ-ს კუთვნილი ავტომობილის დათვალიერებისას მებაჟე ოფიცრებმა არადეკლარირებული საქონელი აღმოაჩინეს. საქართველოს მოქალაქეს ვერცხლის არადეკლარირებული საქონელი: მონეტები (152,97გრ), ბეჭდები (84,15გრ), კულონები (29,29გრ), გულსამაგრი (5,78გრ), ყელსაბამები(31,84გრ), სამაჯურები(6,94გრ), საყურეები (22,2გრ), სუფრის აქსესუარები (13,62გრ), ასევე ვერცხლის ჯართი 30,78 გრამი და ოქროს საათი (39,06გრ). საერთო წონით 417,2 გრამი აღმოაჩნდა. კ.კ-ს აღნიშნული საქონელი ავტომანქანაში, სხვადასხვა ნივთებში ჰქონდა დამალული. საქონლის საბაჟო ღირებულებამ 1296,78 აშშ დოლარი (ექვივალენტი ლარში 3022ლარი) შეადგინა. მოქალაქე კ.კ. საქართველოს საგადასახადო კოდექსის 289-ე მუხლის მე-10 ნაწილის თანახმად დაჯარიმდა და სანქციის სახით შეეფარდა ფულადი ჯარიმა 3022 ლარის ოდენობით.

2 მაისს საბაჟო გამშვებ პუნქტ „თბილისის აეროპორტში“ რეისით “შარჯა-თბილისი” შემოსულ სომხეთის მოქალაქეს, ეჭვის საფუძველზე ხელბარგის დათვალიერებისას არადეკლარირებული საქონელი აღმოაჩნდა. მებაჟე ოფიცრებმა ფ.კ.-ს ხელბარგში 15 ცალი მობილური ტელეფონი (SAMSUNG GALAXY 7ც, IPHONE 7ც, HTC 1 ც), ლეპტოპი (HP), ტაბი (SAMSUNG GALAXY),ფოტოაპარატი (CANON), 24 ც ე.წ. გადამყვანი (USB), ასევე 24 ც. მობილური ტელეფონის დამტენი,21 ც. ყურსასმენი, სათვალთვალო კამერა, პროექტორი და სუნამოები აღმოაჩინეს. საქონლის საბაჟო ღირებულებამ 12423,62 ლარი შეადგინა. ფ.კ-ს სსკ-ის 289-ე მუხლის მე-10 ნაწილის შესაბამისად, სანქციის სახით შეეფარდა ფულადი ჯარიმა 12423,62 ლარის ოდენობით.

2 მაისს, ამავე რეისით თბილისში სომხეთის კიდევ ერთი მოქალაქე ე.მ. ჩამოვიდა, მასაც ხელბარგშიც არადეკლარირებული საქონელი, კერძოდ: 10 ცალი მობილური ტელეფონი (SAMSUNG GALAXY), ლეპტოპი (ACER), 10 ერთეული სუნამო და მობილური ტელეფონების აქსესუარები აღმოუჩინეს. საქონლის საბაჟო ღირებულებამ 4139,68 ლარი შეადგინა. შესაბამისად, ე.მ-ს სსკ-ის 289-ე მუხლის მე -10 ნაწილის თანახმად, სანქციის სახით შეეფარდა ფულადი ჯარიმა 4139,68 ლარი.