ნეპალში, მაშველებმა ნანგრევებიდან 101 წლის მამაკაცი ამოიყვანეს, რომელიც ერთი კვირის განმავლობაში საკუთარი სახლის ნანგრევებში იყო მოყოლილი.

პოლიციის ინფორმაციით, მამაკაცი შაბათს გადააარჩინეს ამჟამად საავადმყოფოში იმყოფება. ექიმების განცხადებით, მამაკაცი სასწაულებრივად გადარჩა.

"ნანგრევებში 7 დღის განმავლობაში ყოფნის შემდეგ 101 წლის მამაკაცის გადარჩენა თეორიულად დაუშვებელი იყო" - აცხადებს ექიმი.

მაშველებემა ნანგრევებიდან კიდევ ორი მამაკაცისა და ერთი ქალის ამოყვანა შეძლეს.

შეგახსენებთ, ნეპალში 7,9 მაგნიტუდის სიმძლავრის მიწისძვრა შაბათს დილით მოხდა. განმეორებითი 6.7 ბალი კი კვირას დაფიქსირდა. მასშტაბურ მიწისძვრებს 7 000-ზე მეტი ადამიანი შეეწირა, დაშავებულია 14 000-ზე მეტი ადამიანი. ბოლო 80 წლის განმავლობაში მსგავსი სიძლიერის მიწისძვრა სამხრეთ აზიაში არ დაფიქსირებულა.

ქვეყანაში უწყვეტად შედის ჰუმანიტარული დახმარება, რომელსაც საჰაერო გზებით მსოფლიოს სხვადასხვა ქვეყნები აგზავნიან. სამძებრო-სამაშველო ოპერაციების განსახორციელებლად უცხოელი პროფესიონალები ნეპალში იმყოფებიან. მიწისძვრით დაზარალებული რაიონების დასახმარებლად გაერომ 15 მილიონი დოლარი გამოყო.

გავრცელებული ინფორმაციით, ნეპალში ჰუმანიტარული კრიზისია. მიწისძვრისგან დაზარალებული მოსახლეობა საკვებისა და სასმელი წყლის გარეშეა დარჩენილი.

ნეპალის პრემიერ მინისტრის განცხადებით, იმის გამო, რომ ნანგრევებში კვლავ უამრავი ადამიანი რჩება, შესაძლოა მსხვერპლის რაოდენობა 10 000-მდე გაიზარდოს.

შინაგან საქმთა სამინისტროს წარმომადგენლის განცხადებით, კი ნაგრევებში მოყოლილი ადამიანები სავარაუდოდ ცოცხლები აღარ არიან.

ხატია ლაღიძე