ნანუაშვილმა სასჯელაღსრულების #9 დაწესებულებაში მყოფი პატიმარი გია ალავიძე მოინახულა

სამართალი - 17:32, 12 Feb, 2013

566

შეხვედრისას მსჯავრდებულმა განაცხადა, რომ თავს არ სცნობს დამნაშავედ და მისი დაკავების ერთადერთი მიზეზი ისაა, რომ სწორედ მან გადასცა ტელეკომპანია "მაესტროს" ვიდეომასალა, სადაც ასახულია სასჯელაღსრულების დაწესებულებაში გირგვლიანის მკვლელობისთვის მსჯავრდებული პირების თვითნებური ქმედებები.

როგორც გია ალავიძემ განაცხადა, 2009 წლის აგვისტოში ის დააკავეს და სამი თვის განმავლობაში ოჯახის წევრებმა არ იცოდნენ მისი ადგილსამყოფელი. მან აღნიშნა, რომ მასზე ზეწოლას ახორციელებდნენ სასჯელაღსრულების დეპარტამენტის თანამშრომლები ოლეგ ფაცაცია, გაგა მკურნალიძე, ვიქტორ ყაჭეიშვილი და გოგა ბუთლიაშვილი.

პატიმარ გია ალავიძეს არ ჰყვას ადვოკატი, თუმცა საქმის მასალების გაცნობის შემდეგ აღმოაჩინა, რომ სასამართლოზე მის უფლებებს სახაზინო ადვოკატი იცავდა, რომელიც არასდროს უნახავს. ის უარს აცხადებს ამნისტიაზე და მოითხოვს მისი საქმის ხელახალ გამოძიებას და ჭეშმარიტების დადგენას.

ომბუდსმენის აპარატის ინფორმაციით, სახალხო დამცველი პატიმარ გია ალავიძეს ადვოკატის აყვანაში დაეხმარება, მის საქმეს დეტალურად შეისწავლის და სამართლებრივ რეაგირებას მოახდენს.