"ჩემი მხრიდან დანდობა არ იქნება"- ოლანდი ბავშვებზე მოძალადე სამხედროების დასჯის პირობას დებს

მსოფლიო - 18:18, 30 Apr, 2015

2230

ცენტრალურ აფრიკაში ევროკავშირის მისიის სამხედროების მხრიდან ბავშვებზე განხორციელებულ სექსუალური ძალადობის შესახებ გავრცელებულ ინფორმაციას საფრანგეთის პრეზიდენტი გამოეხმაურა. ფრანსუა ოლანდმა ინფორმაციის დადასტურების შემთხვევაში დამნაშავეების მკაცრად დასჯის პირობა დადო.

"თუ ეს ინფორმაცია დადასტურდება, სასჯელიც შესაბამისი იქნება, ძალიან მკაცრი. თუ ვინმე ცუდად იქცეოდა, ჩემი მხრიდან დანდობა არ იქნება,"- ამბობს საფრანგეთის პრეზიდენტი.

სკანდალურ დოკუმენტზე პირველი კომენტარი გააკეთა საფრანგეთის გენერალურმა მრჩეველმა ჟილ ჟარონიმ.

„თუ ეს ფაქტები დადასტურდება, ეს იქნება აბსოლუტურად საწინააღმდეგო ჩვენი ღირებულებების, იმ ფასეულობების, რომელსაც საფრანგეთის არმია ატარებს. თუ ეს ფაქტები სიმართლე აღმოჩნდება, პასუხისმგებელი პირებს უმკაცრესი სანქციები დაეკისრებათ,"- აცხადებს ჟილ ჟარონი.

საფრანგეთის თავდაცვის სამინისტროში კი აცხადებენ, რომ ფაქტებს არ დამალავენ და გამოძიებას ბოლომდე მიყვებიან.

„ჩვენ არ ვმალავთ ფაქტებს, ჩვენ ვადგენთ, რამდენად რეალურია ეს ფაქტები. ამ ეტაპზე მეტის არაფრის თქმა არ შეგვიძლია. ინფორმაცია პრესიდან წამოვიდა, დასკვნა მე არ მინახავს. ვიდრე გამოძიება არ დადადასტურებს ფაქტებს, მეტს ვერაფერს ვიტყვით,"- აცხადებს თავდაცვის სამინისტროს პრეს–სპიკერი პიერ ბეილი.

შეგახსენებთ, ფრანგული გამოცემების ინფორმაციით, ცენტრალურ აფრიკაში სამშვიდობო მისიების სამხედროები ბავშვებზე სექსუალურ ძალადობას ახდენდნენ.

საუბარი შეეხება 2013 წლის დეკემბრიდან 2014 ივნისამდე პერიოდზე. როგორც ირკვევა სამხედროები მოზარდებს საკვების სანაცვლოდ სექსუალური კავშირის დამყარებას აიძულებდნენ. სკანდალური ინფორმაციის თანახმად ძალადობაში ქართველი სამხედროებიც მონაწილეობდნენ.