პირი რომელმაც ეკა ბესელიას წითელი ბარათი უჩვენა სასამართლომ გაამართლა

სამართალი - 12:42, 30 Apr, 2015

2248

ზუგდიდის რაიონულმა სასამართომ ეკა ბესელიას და გია ვოლსკის წინააღმდეგ გამართულ აქციაზე დაკავებული რატი ოღუჯავა გაამართლა. სამართალდამცავებმა ოღუჯავა მაშინ დაკავეს, როდესაც იგი აქციაზე წითელი ბარათით ხელში იდგა. რატი ოღუჯავამ „ნიუპოსტთან“ საუბრისას განაცხადა, რომ მისი დაკავება კანონდარღვევით მოხდა და სამართალდამცავებს მისთვის არ განუმარტავთ დაკავები მიზეზი, ხოლო წინააღმდეგობის გაწევას მისი მხრიდან ადგილი არ ჰქონია.

რატი ოღუჯავასთვის დაკავების მიზეზი მხოლოდ სასამართლში გადაყვანის შემდეგ გახდა ცნობილი, სადაც მას განუცხადეს, რომ ბრალად პოლიციისთვის წინააღმდეგობის გაწევა და ხულიგნობა ედებოდა. ოღუჯავას დაკავების პროცესს ერთერთი აქციის მონაწილე კამერით იღებდა. ბრალდებულის ადვოკატმა რომეო საჯაიამ სასამართლოს ვიდეოფირი წარუდგინა, სადაც აღბეჭდილია ოღუჯავას დაკავების პროცესი და ჩანს, რომ დაკავებულს სამართალდამცავებისთვის წინააღმდეგობა არ გაუწევა. ამ მტკიცებულებების საფუძველზე ზუგდიდის რაიონული სასამართლოს მოსამართლემ რატი ოღუჯავა გაამართლა.

რატი ოღუჯავამ „ნიუპოსტთან“ საუბრისას განაცხადა, რომ იგი მისი უკანონოდ დაკავების გასაჩივრებას გეგმავს და მომხდარი პოლიტიურ დევნად შეაფასა.

შეგახსენებთ, რომ ზუგდიდში საპარლამენტო უმრავლესობის ლიდერებს ეკა ბესელიას და გია ვოლსკის წინააღმდეგ აქცია გამართეს.