ნეპალში ჰუმანიტარული კრიზისია. მიწისძვრისგან დაზარალებული მოსახლეობა საკვებისა და სასმელი წყლის გარეშეა დარჩენილი. ისინი მთავრობას უმოქმედობაში ადანაშაულებენ და დახმარებას ითხოვენ.

ერთერთი სოფლის მოსახლეობამ ჰუმანიტარული დახმარების მანქანებს გზა გადაუკეტა და ჰუმანიტარული დახამრება ჩამოტვირთა. მათი თქმით, ხელისუფლება მხოლოდ ცენტრალურ რაიონებს ეხმარება და მათ საკვების გარეშე ტოვებს.

გაერთიანებული ერების ორგანიზაციის განცხადებით, მიწისძვრისრგან დაზარალებული მოსახლეობის დასახმარებლად 415 მილიონი დოლარია საჭირო.

შეგახსენებთ, ნეპალში 7,9 მაგნიტუდის სიმძლავრის მიწისძვრა შაბათს დილით მოხდა. განმეორებითი 6.7 ბალი კი კვირას დაფიქსირდა. მასტაბურ მიწისძვრებს 5 500-ზე მეტი ადამიანი ემსხვერპლა. ბოლო 80 წლის განმავლობაში მსგავსი სიძლიერის მიწისძვრა სამხრეთ აზიაში არ დაფიქსირებულა.

ნეპალის ხელისუფლების გადაწყვეტილებით, დაავადების თავიდან აცილების მიზნით მიწისძვრის შედეგად დაღუპულთა მასობრივი კრემაცია დაიწყო.

ქვეყანაში უწყვეტად შედის ჰუმანიტარული დახმარება, რომელსაც საჰაერო გზებით მსოფლიოს სხვადასხვა ქვეყნები აგზავნიან. სამძებრო-სამაშველო ოპერაციების განსახორციელებლად უცხოელი პროფესიონალები უკვე ნეპალში იმყოფებიან. მიწისძვრით დაზარალებული რაიონების დასახმარებლად გაერომ 15 მილიონი დოლარი უკვე გამოყო.

ხელისუფლების განცხადებით ნანგრევებიდან მოსახლეობის ამოსაყვანად სამაშველო ოპერაციები ამ დრომდე მიმდინარეობს.

ნეპალის პრემიერ მინისტრის განცხადებით, იმის გამო, რომ ნანგრევებში კვლავ უამრავი ადამიანი რჩება, შესაძლოა მსხვერპლის რაოდენობა 10 000-მდე გაიზარდოს.

ხატია ლაღიძე