უკრაინის საგარეო საქმეთა მინისტრმა, პაველ კლიმკინმა გაეროს გენერალური მდივანი პან გი მუნი, მოსკოვში გამარჯვების დღისადმი მიძღვნილ აღლუმში შესაძლო მონაწილეობისთვის გააკრიტიკა.

კლიმკინის განცხადებით, რუსეთმა გაეროს დებულება და მთელი რიგი პრინციპები დაარღვია, შესაბამისად ორგანიზაციის მეთაურის რუსეთში ვიზიტი მოსკოვისთვის არასწორი სიგნალი იქნება. კლიმკინმა იმედი გამოთქვა, რომ პან გი მუნი თავის გეგმაზე უარს იტყვის.

რუსეთის საგარეო საქმეთა მინისტრის განცხადებით, ამ ეტაპზე ღონისძიებაში მონაწილეობაზე დასტური 26-მა ქვეყანამ, მათ შორის ჩრდილოეთ კორეამ, ჩინეთმა და ლათინური ამერიკის რამდენიმე ქვეყანამ განაცხადა.

შეგახსენებთ, რუსეთის მიერ უკრაინაში განხორციელებული აგრესიის გამო, მოსკოვში ჩასვლაზე უარი ევროსაბჭოს პრეზიდენტმა, დონალდ ტუსკმა, გერმანიის კანცლერმა - ანგელა მერკელმა, დიდი ბრიტანეთის პრემიერ-მინისტრმა, დევიდ კემერონმა, აშშ-ის, საქართველის, ავსტრიის, მოლდოვას, ხორვატიის, შვედეთის, ჩერნოგორიის, ფინეთის, სლოვაკეთის, პოლონეთის, ლატვიისა და ლიტვის პრეზიდენტებმაც განაცხადეს. კურილიის საკითხთან არსებული დავის გამო, მოსკოვში არც იაპონიის პრემიერ-მინისტრი, სინძო აბე ჩავა.

ხატია ლაღიძე