სიღნაღის მუნიციპალიტეტის სოფელ ტიბაანში მომხდარ ავტოსაგზაო შემთხვევას ორი ადამიანი, ახალგაზრდა ცოლ-ქმარი ემსხვერპლა. მგზავრები სოფელი ძველანაგიდან, საერთო მეგობრის ქორწილიდან ბრუნდებოდნენ, მანქანაში სულ ხუთი ადამიანი იჯდა. შემთხვევა ღამით მოხდა, სავარაუდოდ, მძღოლმა მოსახვევში საჭე ვერ დაიმორჩილა, რის შედეგადაც ავტომანქანა გზის სავალი ნაწილიდან გადავიდა და უბედურებაც დატრიალდა... გარდაცვლილებს 3 წლის გოგონა დარჩათ.

„ყველანი ერთმანეთის კლასელები, ბავშვობის მეგობრები არინ, ორი ბიჭს მეუღლეები ახლდათ, ერთს კი ცოლი არ ჰყავს ჯერ. ისიც კლასელი იყო, ვისი ქორწილიდანაც ბრუნდებოდნენ. მომხდარს ორი ადამიანი შეეწირა, დაღუპული ცოლ-ქმარი, ბოდბისხეველი ახალგაზრდები არიან. მიშო ალადაშვილი და მარიამ ობოლაშვილიც კლასელები იყვნენ, 21 წლის ახალგაზრდები... მთელი ბავშვობა ერთმანეთი უყვარდათ და სკოლის დამთავრებამდე შეუღლდნენ. 16 პარილს ქორწინების 5 წლისთავი ჰქონდათ. ძალიან ბედნიერები იყვნენ...ქორწილში წასვლამდე გადაუღიათ ფოტოები, მიშო დედა დასტიროდა მათ უკანასკნელ ფოტოს... ორივე ადგილზე გარდაცვლილა“, - ამბობს „კვირის პალიტრასთან“ საუბარში გარდაცვლილების ახლობელი.

მომხდართან დაკავშირებით მიმდინარეობს გამოძიება 276-ე მუხლის მეშვიდე ნაწილით, რაც ტრანსპორტის მოძრაობის უსაფრთხოებისას ექსპლუატაციის წესის დარღვევას გულისხმობს.

წყარო: კვირის პალიტრა