ე.წ "კაბელების საქმეზე" სასამართლო სხდომა 6 მაისს გაგრძელდება

სამართალი - 16:03, 27 Apr, 2015

1069

ე.წ "კაბელების საქმის" წინასასამართლო სხდომა დასრულდა და 6 მაისს განახლდება. დღევანდელ პორცესზე მხარეებმა მტკიცებულებების დაშვების შესახებ შუამდგომლობები დააყენეს. მოსამართლე დაცვის და ბრალდების მხარეების პოზიციებს შემდეგ სასამართლო პროცესზე მოისმენს. მოსამართლემ უნდა მიიღოს გადაწყვეტილება ცნობს თუ არა მტკიცებულებებს დასაშვებად.

დღევანდელ პროცესზე დაცვის მხარემ ექსპერტიზის დასკვნის მტკიცებულების დაუშვებლად ცნობა მოითხოვა.

„ექსპერტიზის დასკვნა ეყრდნობა წერილს, რომელიც ბუნებაში არ არსებობს და არ წარუდგენია ბრალდების მხარეს სასამართლოზე. წერილი არ არსებობს ექსპერტიზის დასკვნაშიც. მიგვაჩნია რომ დაუშვებლად უნდა იქნეს ცნობილი მითიური წერილის საფუძველზე აგებული ექსპერტიზის დასკვნა“, - განაცხადა ბრალდებულების ადვოკატმა ლევან სამუშიამ.

საქმის პროკურორმა ნინო აღლემაშვილმა სასამართლოს სხდომის დასრულების შემდეგ განაცხადა, რომ დაცვის მხარე სასამართლოზე არასწორად აპელირებდა.

„ჩვენი მტკიცებულებები მოპოვებულია კანონის დაცვით. დაცვის მხარემ დააყენა ორი შუამდგომლობა. ერთით ითხოვდა მტკიცებულებების დაშვებას, მეორით კი მტკიცებულებების დაუშვებლობას. მტკიცებულება არის ან დასაშვები, ან დაუშვებელი, ვფიიქრობთ, რომ ეს იყო გაურკვეველი და ბუნდოვანი მოთხოვნა“,- განაცხადა ნინო აღლემაშვილმა.

საქმის პროკურორი მიიჩნევს, რომ დაცვის მხარის მიერ მტკიცებუებები კანონის დარღვევით არის მოპოვებული და მათ არსებულ საქმესთან შემხებლობა არ გააჩნიათ.