,,საქართველოს ეკლესიის მოწამეობრივი გზის მასშტაბი განსაცვიფრებელია“

,,საქართველოს ეკლესიის მოწამეობრივი გზის მასშტაბი განსაცვიფრებელია“ - ამერიკის და კანადის მიტროპოლიტი

რელიგია - 15:12, 26 Apr, 2015

2410

საკვირაო ლიტურგია სამების საკათედრო ტაძარში სრულიად საქართველოს კათალიკოს-პატრიარქმა, უწმინდესმა და უნეტარესმა ილია მეორემ ვაშინგტონის მთავარეპისკოპოსთან, სრულიად ამერიკისა და კანადის მიტროპოლიტ ტიხონთან ერთად აღვლინა.

ილია მეორემ ქადაგებისას ამერიკელ მღვდელმთავარს მიმართა, ამერიკის ეკლესია დალოცა - ,,ამერიკის შეერთებული შტატები საქართველოს მეგობარია“ - აღნიშნა უწმინდესმა.

თავის მხრივ, ვაშინგტონის მთავარეპისკოპოსმა, სრულიად ამერიკისა და კანადის მიტროპოლიტმა ტიხონმა სტუმრობისა და თბილი მიღებისთვის მადლობა გადაუხადა უწმინდეს და საქართველოს მართლმადიდებელი ეკლესიის ისტოორიული როლისა და მნიშვნელობის შესახებ ისაუბრა.

,,მადლიერი ვართ სიმდაბლით სავსე და შთაგონებული საქართველოს წმინდა ეკლესიის მოწამეობრივი გზით 2000 წლის განმავლობაში. მასშტაბი ამ მოწამეობისა განსაცვიფრებელია. მე წუხელ სასულიერო პირებთან ერთად მეტეხის ხიდის გასწვრივ ვსეირნობდი, სადაც 100 ათასი ქართველი მე-13 საუკუნეში ეწამა, რადგან მათ უარი თქვეს საკუთარი რწმენის უარყოფაზე. საქართველოს ქრისტიანი მორწმუნეები, ქრისტეს ემსახურებოდნენ მაშინ, როცა ამქვეყნიური იმედი ამოწურული იყო. ქართველ ხალხს კლავდნენ, ქართულ ეკლესიებს ანადგურებდნენ, მაგრამ რწმენა ნარჩუნდებოდა, როგორც კლდე... ძალიან ბევრი მორწმუნე ამერიკაში მართლმადილებელ ქრისტიანობაზე ახლად მოქცეულია, რომელთაც მართლმადიდებლობასთან კავშირი არ ჰქონიათ. მათ ჩემს მსგავსად აღმოაჩინეს სიცოცხლე ქრისტეში, რაც საქართველოს ეკლესიამ საუკუნეების განმავლობაში იცოდა, იცავდა და თაობიდან თაობას გადასცა", - ბრძანა ვაშინგტონის მთავარეპისკოპოსმა და სრულიად ამერიკისა და კანადის მიტროპოლიტმა.

მიმართვის შემდეგ ილია მეორემ და ამერიკისა და კანადის მიტროპოლიტმა ერთმანეთს სიმბოლური საჩუქრები გადასცეს.