ნინო გვენეტაძე მზადაა შვეიცარიის ელჩს ინფორმაცია პირადად მიაწოდოს

სამართალი - 13:50, 25 Apr, 2015

1502

უზენაესი სასამართლოს თავმჯდომარის განცხადებით, საჭიროების შემთხვევაში ის მზადაა შვეიცარიის ელჩს გიუნტერ ბეხლერს შეხვდეს და მოსამართლეების საქმიანობის შემოწმების შედეგები პირადად გააცნოს. ამის შესახებ გვენეტაძემ ჟურნალისტებთან გიუნტერ ბეხლერის მიერ საქართველოში მოსამართლეების შესაძლო მექრთამეობის შესახებ გაკეთებული განცხადების კომენტირებისას ისაუბრა.

„ჩვენ გავაკეთეთ განცხადება და ფართომასშტაბიანი სამართალწარმოების პრაქტიკის მოკვლევა, გაანალიზება, განზოგადება და სარეკომენდაციო წინადადებების შემუშავება დავისახეთ მიზნად. ეს პროცესი მიმდინარეობს. კონკრეტულ ფაქტთან დაკავშირებით, ასევე, წინასწარი შემოწმება ხდება მოსამართლეების საქმიანობის, დისციპლინური სამართალწარმოების გადაცდომის არსებობის ან არარსებობის შესახებ. როგორც კი ამ სამუშაო ეტაპებს დავასრულებთ, ბუნებრივია, ეს ინფორმაცია გახდება საზოგადოებისთვის ცნობილი. ასევე, თუ ბატონი ელჩი საჭიროდ ჩათვლის, რომ ეს ინფორმაცია კონკრეტულად ჩვენ გადავცეთ, იქნება შეხვედრაც“, - განაცხადა ნინო გვენეტაძემ.

შვეიცარიის კონფედერაციის საგანგებო და სრულუფლებიანი ელჩი საქართველოში გიუნტერ ბეხლერი აცხადებს, რომ მისთვის ინვესტორებისგან მიწოდებული ინფორმაცია - რეგიონებში მოსამართლეეების მხრიდან შესაძლო მექრთამეობის შესახებ, სერიოზულია. შვეიცარიის ელჩი მთავრობის რეაგირებას ელოდება.