ეროსი კიწმარიშვილის საქმესთან დაკავშირებით გამოძიება უცხო მამაკაცის ვინაობის დადგენაზე მუშაობს.

როგორც „ნიუპოსტს“ ზურა კიწმარიშვილმა განუცხადა, სავარაუდოდ მამაკაცი, რომლის ვინაობის დადგენა ამ დრომდე ვერ მოხერხდა, არაქართული გარეგნობის არის.

„მას შემდეგ რაც შესწავლილი იქნა ვიდეომასალა, რამდენიმე პირის მიმართ ინტერესი არსებობდა. ვიდეომასალაში არსებული რამდენიმე პირის იდენტიფიცირება მოხდა და ისინი უკვე დაიკითხნენ. დარჩენილი იყო პიროვნება, რომლის იდენტიფიცირება ამ დრომდე ვერ მოხერხდა. მე მომეჩვენა, რომ ამ პირს არაქართული, სპორტული გარეგნობა ჰქონდა. უფრო ზუსტად რომ ვთქვა ჩრდილოკავკასიური გარეგნობა. აქვს თუ არა ამ პირს შემხებლობა მომხდართან, ამაზე ვერაფერს ვიტყვი. ჩვენ ვიდეომასალაში დავინტერესდით რამდენიმე პირით, ვინც კორპუსთან კონრეტული დროის მონაკვეთში გამოჩნდა. უმეტესი ნაწილი იდენტიფიცირებულია. იყო რამდენიმე ადამიანი, რომელზეც გვაინტერესებდა თუ რატომ იყვნენ ამ ტერიტორიაზე. აქედან გამომდინარე ჩვენ საკმაოდ გაფილტრული ადამიანების ჯგუფი შევადგინეთ და ვთხოვეთ გამოძიებას გაერკვია, რა უნდოდათ ამ პირებს იმ ტერიტორიაზე. აქედან გამომდინარე დავინტერესდით ამ ადამიანითაც, რომლის გამოსახულება გამოძიებას აქვს, მაგრამ ვერ გაარკვია ვინ არის“, - განაცხადა ზურა კიწმარიშვილმა.

მისივე ინფორმაციით, გამოძიება კიდევ ერთი პირით დაინტერესდა. როგორც კიწმარიშვილი განმარტავს, აღნიშნული პიროვნების მიმართ ინტერესი გარკვეული მიზეზების გამო გაჩნდა.

„არის პირი, რომლითაც გარკვეული მიზეზების გამო გამოძიება მისი პიროვნებით დაინტერესდა. გავიგეთ მისი ვინაობა და სახელი. გამოძიებამ ის უკვე დაკითხა და დაიწყო მის შესახებ უფრო მეტი ინფორმაციის მოპოვება. იანვრის ბოლოდან ეს საქმე ცალკე წარმოებად მიმდინარეობს. ამ საქმეს აქვს თუ არა შემხებლობა ჩვენ საქმესთან ამ ეტაპზე ვერ ვიტყვით“, - განაცხადა ზურა კიწმარიშვილმა.

შეგახსენებთ, ეროსი კიწმარიშვილი 15 ივლისს საკუთარ ავტომობილში გარდაცვლილი იპოვეს. მომხდარზე გამოძიება 115-ე მუხლით მიმდინარეობს, რაც თვითმკვლელობამდე მიყვანას გულისხმობს.

ნინო დათაშვილი