თურქეთის პრემიერ-მინისტრის, აჰმედ დავითოღლუს განცხადებით, ის ოსმალეთის იმპერიის დროს დაღუპული სომხების შვილებისა და შვილიშვილების ტკივილს იზიარებს.

პრემიერ-მინისტრის მიერ გავრცელებულ განცხადებაში ნათქვამია, რომ 1915 წელს დაღუპულ სომეხთა ხსოვნას პატივს სტამბოლშიც მიაგებენ და 24 აპრილს სომხების დაღუპვის ასი წლისთავთან დაკავშირებით მემორიალური ღონისძიება გაიმართება.

„სხვადასხვა ეთნიკური და რელიგიური წარმომადგენლების ჯგუფებმა, რომლებიც საუკუნეების განმავლობაში მეგობრულ ატმოსფეროში ცხოვრობდნენ, დიდი ტკივილიც განიცადეს, რომელიც ოსმალეთის იმპერიის ყველა მაცხოვრებლის გონებაში სამუდამოდ დარჩა. მე მსურს, პატივი მივაგო სომეხთა ხსოვნას, რომლებიც გადასახლების დროს დაიღუპნენ და ვიზიარებ მათი შთამომავლების ტკივილს“ - ნათქვამია დავითოღლუს განცხადებაში.

შეგახსენებთ, სომხეთი, ოსმალეთის იმპერიის დროს 1.5 მილიონი სომეხის მკვლელობის გენოციდად აღიარებას მოითხოვს.

15 აპრილს, ევროპარლამენტმა რეზოლუცია მიიღო, რომლითაც სომეხთა მასობრივ მკვლელობას გენოციდი უწოდა და თურქეთს ფაქტის აღიარებისკენ მოუწოდა, რასაც ოფიციალური ანკარა არ ეთანხმება.

ხატია ლაღიძე