ისრაელის პრემიერ-მინისტრი, ბენიამინ ნეთანიაჰუ მოსკოვში, 9 მაისს მეორე მსოფლიო ომის დასრულების 70-ე წლისთავთან დაკავშირებით დაგეგმილ ღონისძიებას არ დაესწრება.

ამის შესახებ, გამოცემა „უკრაინსკაია პრავდა“ Jerusalem Post Israel News-ზე დაყრდნობით წერს.

გამოცემის მიხდევით, აღლუმს არც ქვეყნის საგარეო საქმეთა მინისტრი დაესწრება. ღონისძიებაზე ოფიციალური იერუსალიმის წარმომადგენელი რუსეთში ისრაელის ელჩი იქნება.

ნეთანიაჰუს ადმინისტრაციასა და საგარეო საქმეთა სამინისტროში, მოსკოვში ვიზიტზე უარის თქმის მიზეზებთან დაკავშირებით კომენტარი არ გაუკეთებიათ.

შეგახსენებთ, რუსეთის მიერ უკრაინაში განხორციელებული აგრესიის გამო, მოსკოვში ჩასვლაზე უარი ევროსაბჭოს პრეზიდენტმა, დონალდ ტუსკმა, გერმანიის კანცლერმა - ანგელა მერკელმა, დიდი ბრიტანეთის პრემიერ-მინისტრმა, დევიდ კემერონმა, აშშ-ის, საქართველის, ავსტრიის, მოლდოვას, შვედეთის, ჩერმოგორიის, ფინეთის, სლოვაკეთის, ხორვატიის, პოლონეთის, ლატვიისა და ლიტვის პრეზიდენტებმაც განაცხადეს. კურილიის საკითხთან არსებული დავის გამო, მოსკოვში არც იაპონიის პრემიერ-მინისტრი, სინძო აბე ჩავა.

რუსეთის საგარეო საქმეთა მინისრტის, სერგეი ლავროვის განცხადებით, ამ დროისთვის ღონისძიებაზე დასწრების თანხმობა ჩრდილოეთ კორეის ლიდერმა, კიმ ჩენ ინმა, ინდოეთის პრეზიდენტმა, ასევე სამხრეთ აფრიკის რესპუბლიკის, ვიეტნამის, სომხეთისა და კუბის ლიდერებმა განაცხადეს. აღლუმზე დასწრების მზადყოფნა ჩეხეთისა და საბერძნეთის პრეზიდენტებმაც გამოთქვეს.

რაც შეეხება, ბელორუსიის პრეზიდენტ, ალექსანდრ ლუკაშენკოს, მოსკოვში ჩასვლას არც ბელორუსიის ლიდერი აპირებს. პრეზიდენტის განცხადებით, ამ დღეს მინსკში მისი ყოფნა მნიშვნელოვანია, რადგან აღლუმის ჩაბარება მხოლოდ მთავარსარდალს შეუძლია.

ხატია ლაღიძე