შინაგან საქმეთა მინისტრის ვახტანგ გომელაურის განცხადებით, მთავრობა ბექა მარგიშვილის ოჯახის გარდა, ბორჯომში მოკლულ პოლიციელის ოჯახსაც შეუძენს ბინას. მისი თქმით, ეს გადაწყვეტილება მთავრობამ დღევანდელ სხდომაზე მიიღო.

როგორც ვახტანგ გომელაურმა აღნიშნა, სამსახურებრივი მოვალეობის შესრულების დროს ან ომში დაღუპული პოლიციელების ოჯახის დახმარების შესახებ კანონპროექტის ფარგლებში, სამართალდამცველთა ოჯახები სახელმწიფოსგან ყოველთვიური 1000 ლარიანი დახმარების გარდა, ერთჯერადად 100 000 ლარსაც მიიღებენ.

"კანონპროექტი დღევანდელ სხდომაზე გავიტანეთ. მთავრობამ იმსჯელა და მიიღო გადაწყვეტილება, რომ ყველა დაღუპული პოლიციელის ოჯახი ყოველთვიურად დახმარების სახით 1000 ლარს მიიღებს. ეს შეეხება 1991 წლიდან დაღუპული ყველა იმ პოლიციელის ოჯახს, რომელიც სამსახურებრივი მოვალეობის შესრულების დროს გარდაიცვალა. ასევე, მთავრობამ იმსჯელა და მიიღო გადაწყვეტილება, რომ ყველა დაღუპულ პოლიციელზე გაიცემა ერთჯერადი დახმარება 100 000 ლარის ოდენობით. აღნიშნული ცვლილება ამოქმედდება მას შემდეგ, რაც პარლამენტი შესაბამის კანონპროექტს მიიღებს და ძალაში შევა. რაც შეეხება მიმდინარე წლის განმავლობაში თბილისსა და ბორჯომში მოკლულ პოლიციელებს, მთავრობამ მიიღო გადაწყვეტილება, რომ მათ ოჯახებს შინაგან საქმეთა სამინისტრო ბინებს შეუძენს", - განაცხადა ვახტანგ გომელაურმა.

რუსუდან ქიმერიძე