საქართველოს მესამე პრეზიდეტმა და ამჟამად, უკრაინის პრეზიდენტის, პეტრო პოროშენკოს ერთერთმა მრჩეველმა, მიხეილ სააკაშვილმა ერთ-ერთ ინტერვიუში მომავალ გეგმებზე, უკრაინაში განვითარებულ მოვლენებსა და საკუთარ პოლიტიკურ წარსულზე ისაუბრა. სააკაშვილი, პატიმრობაში მყოფი, ყოფილი ქართველი მაღალჩნოსნების თემასაც შეეხო.

მიხეილ სააკაშვილის განცხადებით, მისმა თანაგუნდელებმა ეს ნაბიჯი გაცნობიერებულად გადადგეს.

მისივე თქმით, მაშინ, როცა ბაჩო ახალიამ საქართველოში დაბრუნების გადაწყვეტილება მიიღო და მას დაურეკა, უთხრა, არ დაბრუნებულიყო.

„დამირეკა და მითხრა, საქართველოს საზღვართან ვიმყოფები და ვბრუნდებიო. ვუთხარი, ხვდებოდა თუ არა, რომ მას დააპატიმრებდნენ. მან კი მიპასუხა: „ვხვდები, მაგრამ ჩემს უდანაშაულობას დავამტკიცებ“ - განაცხადა სააკაშვილმა და დასძინა, რომ მსგავსი გადაწყვეტილება გიგი უგულავამაც მიიღო.

მისი თქმით, დაპატიმრებამდე სამი კვირით ადრე, უგულავას საფრანგეთში შეხვდა, სადაც თბილისის ყოფილმა მერმა უთხრა, რომ ციხეში ჩასმით, მის უდანაშაულობაში ყველა დარწმუნდებოდა.

„შენ ვერ გახდები ახალი ნელსონ მანდელა, ვუთხარი მას, რადგან პოსტსაბჭოთა ქვეყნების ხალხს არ უყვარს ლიდერები, რომლებიც ციხეში სხედან“ - განაცხადა სააკაშვილმა და აღნიშნა, რომ თავისუფლებაზე უარი, ვანო მერაბიშვილმაც გაცნობიერებულად თქვა.

სააკაშვილის თქმით, მერაბიშვილმა იცოდა, მად დაიჭერდნენ, თუმცა ის უდანაშაულო იყო და შესაბამისად, ამის არც ეშინოდა.

"ვანო ხშირად მწერს წერილებს, მამხნევებს. ეს ჩემთვის ძალიან მნიშვნელოვანია" - აღნიშნა სააკაშვილმა.

ხატია ლაღიძე