რუსეთის პრეზიდენტის, ვლადიმერ პუტინის განცხადებით, „მისტრალი“, რომლის გადაცემაზეც საფრანგეთი უარს ამბობს, რუსეთისთვის ფუნდამენტურ მნიშნელობას არ წარმოადგენს. თუმცა, ხელშეკრულების ჩაშლის შემთხვევაში, მოსკოვი პარიზისგან გადახდილი თანხის უკან დაბრუნებას მოითხოვს.

„გემების გადმოცემასთან დაკავშირებით, საფრანგეთთან ხელშეკრულება გაფორმებული გვაქვა. „მისტრალის“ მოწოდებაზე პარიზის უარი, რა თქმა უნდა ცუდის ნიშანია, მაგრამ მერწმუნეთ ჩვენი უსაფრთხოებისთვის ამას დიდი მნიშვნელობა არ აქვს“ - განაცხადა პუტინმა.

მისივე თქმით, მოსკოვი საფრანგეთს ჯარიმის გადახდას არ აიძულებს და იმედს გამოთქვამს, რომ საფრანგეთი ღირსეული პარტნიორი აღმოჩდება, რომელიც გემებისთვის წინასწარ აღებულ თანხას უკან დააბრუნებს. პუტინმა აღნიშნა, რომ თავის დროზე ეს ხელშეკრულება საფრანგეთის დასახმარებლად დაიდო, შესაბამისად რუსული ფლოტისთვის „მისტრალების“ გარეშე არსებობა ტრაგედიას არ წარმოადგენს.

იანვრის დასაწყისში, საფრანგეთის თავდაცვის მინისტრმა ჟან ივ ლე დრიანმა განაცხადა, რომ რუსეთი მხოლოდ იმ შემთხვევაში მიიღებს „მისტრალს“ თუ უკრაინაში მშვიდობის დამყარებას შეუწყობს ხელს.

ვლადიმერ პუტინის „პირდაპირი ხაზი“ დასრულდა. რუსეთის პრეზიდენტი მოსახლეობისა და ჟურნალისტების შეკითხვებს პირდაპირ ეთერში 3 საათზე მეტხანს პასუხობდა.

ხატია ლაღიძე