ავიაკომპანია „ეარ კანადის“ თვითმფრინავი, რომელიც ფრანკფურტიდან ტორონტოს მიმართულებით ასრულებდა რეისს, იძულებული გახდა, ირლანდიაში საგანგებო დაშვება განეხორციელებინა. თვითმფრინავი შანონის საერთაშორისო აეროპორტში დაჯდა.

როგორც მოგვიანებით გაირკვა, მომხდარის მიზეზი ერთ-ერთი მგზავრის არასათანადო ქცევა გახდა. გავრცელებული ინფორმაციით, 87 წლის ქალბატონმა ყვირილი დაიწყო, შემდეგ კი ეკიპაჟის ერთ-ერთ წევრს დაესხა თავს. დასავლური მედია წერს, რომ, ეკიპაჟის ერთი წევრი მან დაკბინა კიდეც. უცნობია, რამ გამოიწვია ქალბატონის გაღიზიანება.

პილოტმა თვითმფინრავის სასწრაფოდ დაშვების გადაწყვეტილება მიიღო. ირლანდიის აეროპორტში ქალბატონი პოლიციამ დაკითხა. თვითმფრინავმა კი, რომლის ბორტზეც 201 ადამიანი იმყოფებოდა, ტორონტოს მიმართულებით რეისი განახორციელა.

როგორც ცნობილია, სამართალდამცველებმა 87 წლის ქალბატონი დაკითხვის შემდეგ გაათავისუფლეს.