თბილისის საქალაქო სასამართლო შალვა აბულაძესთან დაკავშირებით განცხადებას ავრცელებს

სამართალი - 18:41, 11 Apr, 2015

2637

თბილისის საქალაქო სასამართლო შალვა აბულაძესთან დაკავშირებით განცხადებას ავრცელებს. როგორც განცახდებაშია ნათქვამი, 2015 წლის 11 აპრილს თბილისის საქალაქო სასამართლომ განიხილა და დააკმაყოფილა თბილისის პროკურატურის შუამდგომლობა, ახალციხის რაიონული სასამართლოს 2015 წლის 2 თებერვლის განჩინებით ბრალდებულ შალვა აბულაძის მიმართ აღკვეთის ღონისძიების სახედ შეფარდებული პატიმრობის ძალაში დატოვების თაობაზე. განცხადების თანახმად, სასამართლოს გადაწყვეტილება შეიძლება გასაჩივრდეს მისი გამოცხადებიდან 48 საათში, თბილისის სააპელაციო სასამართლოში.აღნიშნულ საქმეზე წინასასამართლო სხდომა გაიმართება 2015 წლის 24 აპრილს 15:00 საათზე თბილისის საქალაქო სასამართლოში.

"შალვა აბულაძეს ბრალად ედება პოლიციელის სიცოცხლის მოსპობა პოლიციელის სამსახურებრივ საქმიანობასთან დაკავშირებით (2 ეპიზოდი), პოლიციელის სიცოცხლის მოსპობის მცდელობა პოლიციელის სამსახურებრივ საქმიანობასთან დაკავშირებით (2 ეპიზოდი, ასევე ცეცხლსასროლი იარაღის მართლსაწინააღმდეგოდ შეძენა, შენახვა და ტარება). ღია სასამართლო სხდომაზე, ბრალდებულ შალვა აბულაძის მიმართ აღკვეთის ღონისძიების სახედ შეფარდებულ პატიმრობის ძალაში დატოვების შუამდგომლობას დაეთანხმა ბრალდებისა და დაცვის მხარეები, ასევე თავად ბრალდებული", - ნათქვამია განცხადებაში.

შეგახსენებთ, რომ ორი პოლიციელის მკვლელობაში ბრალდებული შალვა აბულაძე პატიმრობაში რჩება.სასამართლომ გადაწყვეტილება რამდენიმე წუთის წინ მიიღო. მოსამართლე ბადრი შონიამ დააკმაყოფილა ქალაქის პროკურატურის შუამდგომლობა პატიმრობის დადასტურებასთან დაკავშირებით, რომელსაც არც დაცვის მხარე შეწინააღმდეგებია.სასამართლო პროცესზე აბულაძის ადვოკატმა განაცხადა, რომ მისი დაცვის ქვეშ მყოფს თავისუფლების შემთხვევაში საფრთხე ემუქრება და ეს თავად ბრალდებულმაც გაიზიარა.