ხვალ აღდგომის ბრწყინვალე დღესასწაულია

რელიგია - 17:28, 11 Apr, 2015

2578

12 აპრილს მართლმადიდებელი სამყარო მაცხოვრის მკვდრეთით აღდგომის ბრწყინვალე დღესასწაულს აღნიშნავს. ამ დღესთან დაკავშირებით საქართველოში მოქმედ ყველა მართლმადიდებლურ ტაძარში ღამისთევის მსახურება შესრულდება. მწუხრის ლოცვის შემდეგ ტაძრების გარშემო ლიტანიობა დაიწყება. ლოცვით მსვლელობის დროს სასულიერო პირები, ტაძრის მსახურები და მრევლი ხატებით, ჯვრებითა და ანთებული სანთლებით ჯვრის საგალობელს იგალობებენ. ლიტანიობის შემდეგ ტაძრებში სადღესასწაულო მსახურება გამთენიისას, ცისკრის ლოცვამდე გაგრძელდება.

როგორც ,,ნიუპოსტს“ საპატრიარქოდან აცნობეს, სააღდგომო მსახურებას სრულიად საქართველოს კათოლიკოს-პატრიარქი ილია II სვეტიცხოვლის საკათედრო ტაძარში ჩაატარებს. ღამისთევის მსახურება 00:00 საათზე დაიწყება. როგორც წესი, ტაძარში ჯერ პატრიარქის სააღდგომო ეპისტოლეს წაიკითხავენ, რის შემდეგაც სვეტიცხოვლის ტაძრის გარშემო ლიტანიობა ჩატარდება.

საქართველოს ყველა მოქმედ ტაძარში განაწლდება მაცხოვრის საფლავიდან გარდამოსული წმნიდა ცეცხლი, რომელსაც თბილისის აეროპორტში ღამის 23:35 საათზე და 00:50 საათზე თელავივის ჩარტერული რეისით ჩამოაბრძანეს. ტაძრებში ასევე წაიკითხება პატრიარქის ეპისტოლე, ხოლო გამთენიისას წირვის დასრულების შემდეგ მოხდება სააღდგომო პასკებისა და წითელი კვერცხის კურთხევა.

აღდგომის დღესასწაულზე 50 დღიანი მარხვა სრულდება, რომელიც წელს 23 თებერვალს დაიწყო. აღდგომის შემდეგ ბრწყინვალე შვიდეული მსგეფსია და მრევლს ყოველგვარი საკვების მიღება შეეძლებათ.

აღდგომა უდიდესი ქრისტიანული დღესასწაული, რომელიც აღინიშნება ახალი სტილით 4 აპრილსა და 8 მაისს შორის ქრისტეს მკვდრეთით აღდგომასთან დაკავშირებით. აღდგომას უძღვის 40–დღიანი მარხვა, საეკლესიო სამზადისი, აღსარება და ზიარება, ვნების კვირა. ესაა ზეიმთა ზეიმი, აღმნიშვნელი მესიის მოვლინებისა, რაზედაც მოსეს ხალხი ეგვიპტის მონობიდან თავის დაღწევის შემდეგ ოცნებობდა, რასაც ბიბლიური წინასწარმეტყველნი ქადაგებდნენ და რაც სინედრიონის ნებით ჯვარცმული ქრისტეს სახით განხორციელდა. წმინდა სახარების მიხედვით, უფალი ისეო კაცობრიობას ცოდვებისაგან გამოსასყიდად მოევლინა. უფალი განკაცდა და თავისი ჯავრცმით სამყარო ადამინური ცოდვებისგან იხსნა. ჯვარცმის შემდეგ მაცხოვარმა ჯოჯოხეთი შემუსრა და იქიდან მართალი სულები ამოიყვანა, რომელთათვისაც სამოთხის კარი ადამისა და ევას შეცოდების შემდეგ დახურული იყო. მაცხოვრის ჯვარცმითა და მისი ბრწყინვალე აღდომით ადამიანისთვის სამოთხის კარი კვლავ გაიღო.

თავდაპირველად ქრისტიანული ეკლესია მხოლოდ ვნების დღეებს ზეიმობდა. IV საუკუნეში მიეცა აღდგომის დღესასწაულს თანამედროვე სახე. ნიკეის პირველმა მსოფლიო საეკლესიო კრებამ 325 წელს დაადგინა ზეიმის აღნიშვნა გაზაფხულის ბუნიობის მომდევნო კვირას, იუდეველთა პასექის დასასრულს, უთუოდ მისგან განცალკევებით და კვირის ბოლოს. ეს ხვდება ახალი სტილით 4 აპრილიდან 8 მაისამდე. ამიტომ განეკუთვნება აღდგომა მოძრავ დღესასწაულებს.