მნიშვნელოვანი დეტალი - ეროსი კიწმარიშვილის იარაღზე უცხო პირის დნმ აღმოჩნდა

სამართალი - 21:42, 10 Apr, 2015

1973

მნიშვნელოვანი დეტალი ეროსი კიწმარიშვილის საქმეში. გარდაცვლილი კიწმარიშვილის იარაღზე უცხო პირის დნმ აღმოჩნდა, რომლის არსებობა სამხარაულის სახელობის ექსპერტიზამ დაადასტურა. გამოძიების მიერ დნმ-ის ანალიზის შემოწმება დაიწყო, ზურა კიწმარიშვილის განცხადებით, იდენტიფიცირებისთვის შემოწმდა სატელეფონო ანძები, თუმცა ვისი დნმ-ია იარაღზე, რომლითაც გასროლა მოხდა, პროკურატურის მიერ ამ დრომდე ვერ დადგინდა.

,,ეს არის უცხო დნმ-ი, რომლითაც შესაძლებელია პიროვნების იდენტიფიკაცია. მნიშვნელოვანია ის მოქმედებები, რომლითაც შესაძლოა გამოიკვეთოს ის ადამიანები, რომლებიც შესაძლოა კავშირში იყვნენ მომხდარ ფაქტთან“ - აცხადებს ზურა კიწმარიშვილი. მისი თქმით, გამოძიებამ ის პირები შეამოწმა და მოხდა შედარება, ვინც ეროსი კიწმარიშვილის ახლო გარემოცვაა და ვინც კიწმარიშვილი გარდაცვლილი პირველად ნახა.

კიწმარიშვილის ადვოკატი გაგი მოსიაშვილი საკვლევი ობიექტების რიცვის გაზრდას ითხოვს.

საქმის ახალი გარემოების გარდა, კიწმარიშვილების ოჯახს პრეტენზიები პროკურატურასთანაც აქვთ. ზურა კიწმარიშვილის ამბობს, რომ საგამოძიებო მოქმედებები ბოლო პერიოდში შეფერხებულია. ,,ჩვენი შეხვედრა გადაიდგო გაურკვეველი დროით და ჩვენ დღესაც ვცდილობთ, თუ როდის შეიძლება, რომ ჩვენი ვიზიტები განახლდეს პროკურატურაში“ - აცხადებს ზურა კიწმარიშვილი. პროკურატურაში ამ თემაზე კომენტარს არ აკეთებენ, უცნობია გამოძიების პოზიცია საქმის ახალი გარემოებების შესახებაც.