შალვა აბულაძეს, რომელსაც ორი პოლიციელის მკვლელობას ედავებიან, პოლიცია ერთ კვირაზე მეტ ხანს ეძებდა. გავრცელებული ინფორმაციით, დაკავებული ბორჯომიდან თბილისში გადაჰყავთ. თუმცა, აბულაძის დაკავებას არ ადასტურებს მისი სახაზინო ადვოკატი. იგი აცხადებს, რომ აბულაძე რომ დაეკავებინათ, მას აუცილბლად ეცოდინებოდა.

შეგახსენებთ, რომ შალვა აბულაძეს ბრალად ედება ორი პოლიციელის მკვლელობა. ბოლო შემთხვევა 4 აპრილს მოხდა. ღამით, თბილისში, ვარკეთილში, სამსახურეობრივი მოვალეობის შესრულებისას ორ პოლიციელს შეიარაღებულმა პირმა ცეცხლი გაუხსნა. ერთ–ერთი მათგანი საავადმყოფოში მიყვანის შემდეგ გარდაიცვალა, ხოლო მეორე ამ დრომდე მკურნალობს. შსს–ში აცხადებენ, რომ აბულაძე კიდევ ერთი პლიციელის მკვლელობაშია ბრალდებული, ეს მკვლელობის ხელწერითა და იარაღის ტიპით დგინდება. საუბარია 2015 წლის 23 იანვარს, ბორჯომში, ლიკანში, სამსახურეობრივი მოვალეობის შესრულებისას დაჭრილ პოლიციელზე, გიორგი ბერუაშვილზე, რომელიც მიყენებული ჭრილობების შედეგად 6 თებერვალს გარდაიცვალა. აბულაძემ მაშინაც ორი პოლიციელი დაჭრა, გიორგი ბერუაშვილი და გიორგი მახარაშვილი.

ქ. თბილისის პროკურატურამ შალვა აბულაძეს ბრალი დაუსწრებლად წაუყენა საქართველოს სისხლის სამართლის კოდექსის 353,1-ე მუხლის მე-3 ნაწილით, 19,353,1-ე მუხლის მე-3 ნაწილითა და 236-ე მუხლის პირველი და მეორე ნაწილებით, რაც გულისხმობს პოლიციელის სიცოცხლის მოსპობას მის სამსახურებრივ საქმიანობასთან დაკავშირებით და ცეცხლსასროლი იარაღის მართლსაწინააღმდეგო შეძენა, შენახვა, ტარებას.

წყარო: http://sknews.ge/