საფრთხის დონის მატების საპასუხოდ პუტინი თავდაცვის პოტენციალის გაძლიერებას აპირებს

მსოფლიო - 17:06, 09 Apr, 2015

1467

თავდაცვის პოტენციალის გაძლიერება წარმოადგენს მშვიდობიანი ცხოვრების და რუსეთის სუვერენული განვითარების უმნიშვნელოვანეს პირობას. ამის შესახებ რუსეთის პრეზიდენტმა ვლადიმერ პუტინმა კრემლში სამხედრო მაღალჩინოსნებთან შეხვედრის დროს განაცხადა.

„სამხედრო მშენებლობა, თავდაცვის პოტენციალის განმტკიცება მომავალშიც სისტემატურად და თანმიმდევრულად გაგრძელდება. ჩვენ ყველას კარგად გვესმის, რომ ეს არის რუსეთის განვითარების მნიშვნელოვანი ფაქტორი და ჩვენი მილიონობით მოქალაქის მშვიდობიანი ცხოვრების პირობა“- განაცხადა პუტინმა.

პუტინის თქმით, რუსეთში კვლავ გაგრძელდება საჯარისო ნაწილების ინტენსიური საბრძოლო მზადება და მიმდინარე წელს ფართომაშტაბიანი შემოწმება ყველა სამხედრო დანაყოფს მოიცავს.

სამხედრო მზადყოფნასთან დაკავშირებული ბოლო მოულოდნელი შემოწმება პუტინის ბრძანებით 16-21 მარტს ჩრდილოეთ ფლოტს, სადესანტო, შორეული და სამხედრო-სატრანსპორტო ავიაციის დანაყოფებს ჩაუტარდათ.

მსგავსი ღონისძიებები დასავლეთის ქვეყნების შეშფოთებას იწვევს, "ნატოს" გენერალური მდივნის იენს სტონტელბერგის განცხადებით: „დაუგეგმავი სწავლებების სიხშირე, ხელს არ უწყობს სტაბილურობას“.

პუტინმა სამხედრო მაღალჩინოსნებთან შეხვედრისას ასევე განაცხადა, რომ „რუსეთის სტრატეგიულად მნიშვნელოვან რაიონებში კონფლიქტის პოტენციალი იზრდება“ და საფრთხის დონე მატულობს, რასაც რუსეთი უყურადღებოდ არ დატოვებს.

_{ნინო ზედგენიძე}