,,ეს არის შეურაცხყოფა“ - იური ვაზაგაშვილის ადვოკატი ეჭვიანობის ნიადაზე მკვლელობას გამორიცხავს

სამართალი - 20:36, 08 Apr, 2015

2939

იური ვაზაგაშვილის ოჯახის ადვოკატი გაგი მოსიაშვილი კატეგორიულად უარყოფს ინფორმაციას, რომ ვაზაგაშვილის მკვლელობა ეჭვიანობის ნიადაგზე მოხდა.

ამის შესახებ მოსიაშვილმა „ნიუპოსტთან“ საუბარში განაცხადა.

მისი თქმით, ადვოკატ სოსო ჯოგლიძის მიერ გავრცელებული ინფორმაცია არის შეურაცხყოფა და ამორალური ქმედება.

„ჩემი მხრიდან ამის შეფასება სამართლებრივად არასწორია. ადგილი აქვს კიდევ ერთ პროვოცირებას. გარდაცვლილ ადამიანსაც კი არ ასვენებენ და მაპროვოცირებელ განცხადებებს ავრცელებენ. მინდა დაგიდასტუროთ, რომ ბატონ იური ვაზაგაშვილზე პატიოსანი ადამიანი ქვეყანაში ბევრი არ იყო. ვწუხვარ, რომ ამ არასწორ თამაშში ჩემი კოლეგები იღებენ მონაწილეობას. ეს არის ორღობეში ადამიანის ჭორაობის დონეზეა დასული ინფორმაცია“, - განაცხადა მოსიაშვილმა.

რაც შეეხება საქმის მიმდინარეობას, ადვოკატი ამბობს, რომ გამოძიების მიმდინარეობის პროცესში ძალიან საინტერესო დეტალები გამოიკვეთა.

„რაც შეეხება დნმ-ის მესამე კვალს, ამ მიმართულებით მნიშვნელოვანი ინფორმაციის მოპოვება ხდება, რაც ემსახურება იური ვაზაგაშვილის მკვლელების დადგენას და შემკვეთების დასახელებას. ჩვენ ვამბობდით, რომ კონკეტულად სოსანაშვილს პირადი ინტერესი ვაზაგაშვილის მიმართ არ ჰქონდა, ამიტომ ვფიქრობთ, ეს არ იყო მის მიერ მოფიქრებული მკვლელობა. მის უკან დგანან შემკვეთები, რომლის გამოვლენა საგამოძიებო ორგანოს მოვალეობაა. დაველოდები სგაგამოძიებო ორგანოების მხრიდან მტკიცებულებებით გამყარებულ ინფორმაციას. ვფიქრობ, ამ საქმეს აქვს იმის რესურსი, რომ მოხდეს სხვა პირთა გამოვლენა, რომლებიც კავშირში იყვნენ ვაზაგაშვილის მკვლელობასთან“, - განაცხადა ადვოკატმა.

შეგახსენებთ, „ნიუპოსტთან“ საუბარში იური ვაზაგაშვილის საქმეზე დაკავებული გია სოსანაშვილის ადვოკატმა სკანდალური განცხადება გააკეთა და აღნიშნა, რომ შესაძლოა მკვლელობა ეჭვიანობის ნიადაგზე მომზდარიყო.

ნინო დათაშვილი