პოლიციელების მკვლელობაში ბრალდებულის, შალვა აბულაძის დასაკავებლად ინტენსიური სამუშაოები მიმდინარეობს.

ამის შესახებ შინაგან საქმეთა მინისტრის მოადგილემ ლევან იზორიამ განაცხადა.

"ვერ ვიტყვი, რომ ადგილი აქვს დაკავების პროცესის გაჭიანურებას, როცა ასეთი სპეციფიკის დანაშაულთან როცა გვაქვს საქმე, ეს ითხოვს დროს, ითხოვს სერიოზულ დაგეგმვას და ბუნებრივია, ინტენსიურად მიმდინარეობს სამუშაოები ამ პირის დაკავების მიზნით“, - განაცხადა იზორიამ.

4 აპრილს, საღამოს საათებში, თბილისში, ვარკეთილის მეტროსთან, ჯავახეთის ქუჩაზე, შსს-ს ისანი-სამგორის სამმართველოს მე-8 განყოფილების უბნის ინსპექტორ-გამომძიებელი ბექა მარგიშვილი დეტექტივის თანაშემწე - გამომძიებელ ვალერიან გრძელიშვილთან ერთად სამსახურებრივ მოვალეობას ასრულებდა, რა დროსაც მათ გადამოწმების მიზნით პიროვნება შეაჩერეს. აღნიშნულმა პირმა მოულოდნელად პოლიციელების მისამართით ცეცხლსასროლი იარაღიდან ცეცხლი გახსნა და შემთხვევის ადგილიდან მიიმალა. სროლის შედეგად ორივე სამართალდამცველი დაიჭრა.

მიყენებული ჭრილობების შედეგად ბექა მარგიშვილი საუნივერსიტეტო კლინიკაში გადაყვანის შემდეგ გარდაიცვალა.