ბორჯომში მოკლული პოლიციელის ოჯახის წევრები შალვა აბულაძის დაკავებას და დასჯას ითხოვენ

სამართალი - 11:11, 06 Apr, 2015

7293

ბორჯომში მოკლული პოლიციელის გიორგი ბერუაშვილის ოჯახის წევრები შალვა აბულაძის დაუყოვნებლივ დაკავებას და მის უმკაცრესად დასჯას ითხოვენ. ისინი შინაგან საქმეთა სამინისტროს ქმედითი ნაბიჯების გადადგმისაკენ მოუწოდებენ.

გიორგი ბერუაშვილის დედა 2012 წლის ამნისტიით აბულაძის ციხიდან გამოშვებასაც აპროტესტებს.

გამოძიების ინფორმაციით, აბულაძე პოლიციელების გიორგი ბერუაშვილის მკვლელობისა და გიორგი მახარაშვილის მკვლელობის მცდელობისთვისაც იძებნებოდა. ამჟამად კი შალვა აბულაძე პოლიციელის, ბექა მარგიშვილის მკვლელობაშია ეჭვმიტანილი.

შსს-ს ცნობით, მიმდინარე წლის 23 იანვარს ლიკანში შსს-ს სამცხე-ჯავახეთის სამხარეო მთავარი სამმართველოს ბორჯომის რაიონული სამმართველოს უბნის ინსპექტორ-გამომძიებლები - გიორგი ბერუაშვილი და გიორგი მახარაშვილი სამსახურებრივი მოვალეობის შესრულებისას ფეხით პატრულირებას ახორციელებდნენ, რა დროსაც წარსულში მრავალჯერ ნასამართლევმა, ბორჯომში მცხოვრებმა, 1977 წელს დაბადებულმა შალვა აბულაძემ შემხვედრ პოლიციელებს დანახვისთანავე ცეცხლსასროლი იარაღიდან ცეცხლი გაუხსნა და შემთხვევის ადგილიდან მიიმალა. გიორგი ბერუაშვილი მიყენებული ჭრილობების გამო რამდენიმე დღეში გარდაიცვალა.

ასევე 4 აპრილს, საღამოს საათებში, თბილისში, ვარკეთილის მეტროსთან, ჯავახეთის ქუჩაზე, შსს-ს ისანი-სამგორის სამმართველოს მე-8 განყოფილების უბნის ინსპექტორ-გამომძიებელი ბექა მარგიშვილი დეტექტივის თანაშემწე - გამომძიებელ ვალერიან გრძელიშვილთან ერთად სამსახურებრივ მოვალეობას ასრულებდა, რა დროსაც მათ გადამოწმების მიზნით პიროვნება შეაჩერეს. აღნიშნულმა პირმა მოულოდნელად პოლიციელების მისამართით ცეცხლსასროლი იარაღიდან ცეცხლი გახსნა და შემთხვევის ადგილიდან მიიმალა. სროლის შედეგად ორივე სამართალდამცველი დაიჭრა.

მიყენებული ჭრილობების შედეგად ბექა მარგიშვილი საუნივერსიტეტო კლინიკაში გადაყვანის შემდეგ გარდაიცვალა. ვალერიან გრძელიშვილს სამედიცინო დახმარება პირველ კლინიკურ საავადმყოფოში უტარდება.