თურქი პროკურორი, მეჰმედ სელიმ კირაზი, რომელიც გუშინ სტამბოლის სასამართლოში ორმა შეიარაღებულმა პირმა მძევლად აიყვანა, სპეცოპერაციის დროს დაიჭრა და საავადმყოფოში გარდაიცვალა.

ლიკვიდირებულია ორივე თავდამსხმელიც.

მეჰმედ სელიმ კირაზი, 2013 წელს, ანტისამთავრობო გამოსვლების დროს დაღუპული ბერკინ ელვანის საქმეს იძიებდა, რომელიც 269 დღიანი კომის შემდეგ, გასული წლის მარტში გარდაიცვალა და რომლის მკვლელობასაც პოლიციელს აბრალებენ. თავდამსხმელები, რომლებიც მემარცხენე რადიკალური მარქსისტული დაჯგუფების წევრები იყვნენ, დამნაშავე პოლიციელის დასჯას ითხოვდნენ და ხელისუფლებას მოთხოვნის შესასრულებლად რამდენიმე საათი მისცეს.

სტამბოლის პროკურატურის განცხადებით, თავდამსხმელებთან მოლაპარაკებები 6 საათის განმავლობაში მიმდინარეობდა და შეთანხმებასაც მიაღწიეს, თუმცა სასამართლოს შენობიდან სროლის ხმა გაისმა, რის გამოც სპეცოპერაციის დაწყება გახდა აუცილებელი.

შეგახსენებთ, 2013 წელს, ანტისამთავრობო აქციის დროს, ბერკინ ელვანს, პოლიციელის მიერ ნასროლი ცრემლსადენი გაზის ავზი თავში მაშინ მოხვდა, როცა სახლიდან მაღაზიაში პურის საყიდლად მიდიოდა. რის შედეგადაც, 15 წლის ბიჭი 9 თვის განმავლობაში კომაში იყო, ხოლო 2014 წლის მარტში კი გარდაიცვალა.

ხატია ლაღიძე