ოზურგეთში ადგილობრივი სპორტსკოლის კალათბურთელი დაჭრეს. წინასწარი ინფორმაციით, შემთხვევა რამდენიმე დღის წინ, 29 მარტს მოხდა.

დაზარალებულის ბებიას, ეთერ ჯინჭარაძის ინფორმაციით, ინცინდენტამდე რამდენიმე წუთით ადრე ანზორი სახლში იყო და კომპიუტერთან მუშაობდა, თუმცა ამ დროს მას ტელეფონით დაუკავშირდნენ.

"მითხრა, მალე მოვალო და რომ შემოვიდა სულ გასისხლიანებული იყო, მეზობლად მცხოვრებ ექთანს დავუძახე და საავადმყოფოში გადავიყვანეთ", -იხსენებს ბებია.

დაჭრილი ახალგაზრდა ოზურგეთის სამიდიცინო ცენტრშია გადაყვანილი, სადაც მას ოპერაცია გაუკეთდა. 16 წლის ახალგაზრდას ჭრილობა გულკერდის წინა ზედაპირზე აქვს მიყენებული. მისი ჯანმრთელობის მდგომარება ამ ეტაპზე სტაბილურია და ის პოლიციის ზედამხედველობის ქვეშ იმყოფება.

დაშავებულმა თავდაპირველად მომხდარი ფაქტი დამალა და განაცხადა, რომ შუშაზე დაეცა.

როგორც „ნიუპოსტს“ ოზურგეთის საგანმანათლებლო რესურსცენტრში განუცხადეს, დაჭრილი ანზორ ჯინჭარაძე ოზურგეთის არც ერთი საჯარო სკოლის მოსწავლე არ არის და ის სავარაუდოდ კოლეჯ „ჰორიზონტის" სტუდენტად ითვლება.

კოლეჯის ხელმძღვანელი ნანა ჯოლია კი გვეუბნება, რომ კონკრეტული სახელი და გვარი მათ ბაზაში არ იძებნება, აქედან გამომდინარე ის „ჰორიზონტის" სტუდენტი არ არის.

თუმცა მოგვიანებით გაირკვა, რომ ჯინჭარაძემ ოზურგეთის სასულიერო გიმნაზიის რვაწლედი დაასრულა და ამჟამად ოზურგეთის სპორტსკოლის შემადგენლობაში საქართველოს ბავშვთა ლიგაზე გამოდის.

დამატებითი ინფორმაციის მისაღებად კი პროკურატურის პრესცენტრთან გადაგვამისამართეს, საიდანაც კონკრეტული ინფორმაციას ამ დრომდე ველოდებით.