რუსი ოპოზიციონერის, ბორის ნემცოვის მკვლელობის გამოძიებაში ახალი დეტალები გამოიკვეთა.

გამოცემა „კომერსანტის“ ინფორმაციით, საქმეში ახალი მოწმე გამოჩნდა.

27 წლის ვინმე ევგენის ჩვენების მიხედვით, ბორის ნემცოვის მკვლელის აღწერილობა ოპოზიციონერის მკვლელობაში ეჭვმიტანილი, ზაურ დადაევის გარეგნობას არ ემთხვევა.

გარდა ამისა, მისივე თქმით, უკრაინელი მოდელი ანა დურეცკაია მკვლელობის ერთადერთი მოწმე არ იყო. ოპოზიციონერზე თავდასხმის მომენტში, მასთან ორი ქალი მივიდა, რომლებაც რაღაც უთხრეს და მაშინვე გაუჩინარდნენ.

მოწმის თქმით, ქილერი შემთხვევის ადგილიდან თეთრი მანქანით, სავარაუდოდ "პრიორით" მიიმალა.

„კომერსანტის“ ინფორმაციით, მომწეს ყურსასმენები ეკეთა და ტელეფონს უყურებდა, სწორედ ამიტომ მან სროლის ხმა ვერ გაიგო, თუმცა, როდესაც ხიდზე მწოლიარე მამაკაცი დაინახა, მის დახმარებლად მივიდა.

„დავინახე, როგორ ჩაჯდა მანქანაში ახალგაზრა, საშუალო სიმაღლის, გამხდარი მამაკაცი თეთრი ფერის მანქანაში. ხიდის მოაჯირთან გოგონა იდგა, ხიდზე კი კაცი იწვა. როცა მივუახლოვდი, ის ცოცხალი იყო, ამიტომ ვიფიქრე, რომ მამაკაცი უბრალოდ დათვრა, მაგრამ უეცრად მის სხეულზე სისხლის ნაკვალევი შევნიშნე. შევეცადე დავხმარებოდი და თავი ავუწიე. თუმცა ის უკვე გარდაცვლილი აღმოჩნდა“ - წერს „კომერსანტი“ წყაროზე დაყრდნობით.

შეგახსენებთ, რუსი ოპოზიციონერი ბორის ნემცოვი, 27 თებერვალს კრემლთან ახლოს ხიდზე მოკლეს. პოლიციამ, მკვლელობაში ეჭვმიტანილი 5 ადამიანი დააკავა. ერთერთმა ეჭვმიტანილმა, ზაურ დადაევმა აღიარებითი ჩვენებაც მისცა და განაცხდა, რომ ნემცოვი მუჰამედ წინასწარმეტყველის შესახებ ნეგატიური განცხადებების გაკეთებისა და "შარლი ებდო-ს" კარიკატურების მხარდაჭერის გამო მოკლა.

ხატია ლაღიძე