ნატო-ს გენერალურმა მდივანმა, იენს სტოლტენბერგმა ვაშინგტონში, ნატო-ს ყოველწლიურ სემინარზე სიტყვით გამოსვლისას ალიანსის უსაფრთხოების პოლიტიკასა და მის წინაშე არსებულ გამოწვევებზე ისაუბრა.

„გასულ წელს რუსეთის მიერ უკრაინის ანექსიამ და იქ განხორციელებულმა აგრესიულმა ქმედებებმა, ასევე ჩრდილოეთ აფრიკასა და ახლო აღმოსავლეთში ძალადობის ზრდამ, რადიკალურად შეცვალა ჩვენი უსაფრთხოების პოლიტიკა. ეს პრობლემები უახლოეს მომავალში არ გაქრება, ამიტომ მოულოდნელობებისთვის მზად უნდა ვიყოთ“ - განაცხადა სტოლტენბერგმა .

ალიანსის გენერალური მდივანი რუსეთის აგრესიულ პოლიტაკას შეეხო. მისი თქმით, ის წვრთნები, რომელსაც რუესთი ატარებს, ქვეყნის აგრესიულ პოლიტიკას შეესაბამება. სტოლტენბერგმა აღნიშნა, რომ ალიანსი განაგრძობს სამხედრო წვრთნებზე დაკვირვებას და აღმოსავლეთ ევროპაში საკუთარი წარმომადგენლების რაოდენობას გაზრდის.

„დღეს, არ შეგვიძლია არჩევანი კოლექტიური თავდაცვის გაძლიერებასა და კრიზისების მართვას შორის გავაკეთოთ. პირველად ნატო-ს ისტორიაში, ჩვენ ორივე უნდა გავაკეთოთ“ - დასძინა სტოლტენბერგმა.

ხატია ლაღიძე