საფრანგეთში, გერმანული ავიაკომპანია "ჯერმანვინგის" თვითმფრინავის კატასტროფის შედეგად დაღუპულთა შორის ორი მცირეწლოვანი ბავშვია, 16 სკოლის მოსწავლე და ორი მასწავლებელია.

ცოტა ხნის წინ, საფრანგეთის სამხრეთ ნაწილში ავიაკომპანია "ჯერმანვინგის" კუთვნილმა თვითმფრინავმა კატასტროფა განიცადა.

თვითმფრინავი, Airbus A320, რომელიც ბარსელონადან დიუსელდორფის მიმართულებით მიფრინავდა, ზემო პროვანსის ალპების ტერიტორიაზე ჩამოვარდა.

ბორტზე 142 მგზავრი და ეკიპაჟის 8 წევრი წევრი იმყოფებოდა.

საფრანგეთის პრეზიდენტის განცხადებით, სავარაუდოდ ყველა მგზავრი დაიუპა. დარუპულთა შორის არიან გერმანიის, საფრაგეთისა და თურქეთის მოქალაქეები.

გავრცელებული ინფორმაციით, თვითმფრინავს პრობლემები აფრენიდან რამდენიმე წუთში დაეწყო, სიმაღლეს კარგავდა და განგაშის სიგნალს იძლეოდა.

მაშველები თვითმფრინავს ამ დრომდე ეძებენ. თუმცა, ფაქტობრივად გზის არარსებობის გამო, კატასტროფის ადგილამდე მიღწევას ვერ ახერხებენ.

"ჯერმანვინგის" პრესსამსახურის განცხადებით, თვითმფრინავი ტექნიკურად გამართული იყო, ხოლო პილოტი კი 10-წლიანი გამოცდილების მქონე.

გავრცელებული ინფორმაციით, მომხდარის გამო, ესპანეთის მეფე და დედოფალი ელისეის სასახლეში საფრანგეთის პრეზიდენტ ფრანსუა ოლანდთან ჩავიდნენ. საფრანგეთში ჩასვლას, გერმანიის კანცლერი ანგელა მერკელიც გეგმავს.

ხატია ლაღიძე