საფრანგეთში, გერმანული კომპანია "ჯერმანვინგის" კუთვნილი თვითმფრინავის კატასტროფის შედეგად, გარდაცვლილი 142 მგზავრიდან 42 ესპანეთის მოქალაქეა. ამის შესახებ "როიტერი" იტყობინება.
გავრცელებული მომხდარის გამო, ესპანეთის მეფე და დედოფალი ელისეის სასახლეში საფრანგეთის პრეზიდენტ ფრანსუა ოლანდთან ჩავიდნენ.

ავიაკატასტროფას, „ჯერმანვინგის“ თვითმფრინავის მფლობელი ავიაკომპანია "ლუფთჰანზა" ეხმაურება.

"ჩვენ ჯერ არ ვიცით რა მოუვიდა ნომერ 4U 9525 ფრენას. ვუსამძიმრებთ მგზავრების და ეკიპაჟის წევრების ოჯახებს. თუ ეს ამბავი დადასტურდა, ეს იქნება "ლუფთჰანზას" ისტორიაში ყველაზე მძიმე დღე. ვიმედოვნებთ, რომ გადარჩენილების პოვნას შეძლებენ", - წერს "ლუფთჰანზას" წარმომადგენელი სოციალურ ქსელში.

ცოტა ხნის წინ, საფრანგეთის სამხრეთ ნაწილში ავიაკომპანია "ჯერმანვინგის" კუთვნილმა თვითმფრინავმა კატასტროფა განიცადა.

თვითმფრინავი, Airbus A320, რომელიც ბარსელონადან დიუსელდორფის მიმართულებით მიფრინავდა, ზემო პროვანსის ალპების ტერიტორიაზე ჩამოვარდა.

ბორტზე 142 მგზავრი და ეკიპაჟის ექვსი წევრი იმყოფებოდა.

საფრანგეთის პრეზიდენტის განცხადებით, სავარაუდოდ ყველა მგზავრი დაიუპა. მგზავრთა უმრავლესობა გერმანიის მოქალაქეა.

გავრცელებული ინფორმაციით, თვითმფრინავს პრობლემები აფრენიდან რამდენიმე წუთში დაეწყო. ჩამოვარდნამდე, რამდენიმე წუთით ადრე პილოტები განგაშის სიგნალს იძლეოდნენ.

მაშველები თვითმფრინავს ამ დრომდე ეძებენ. თუმცა, ფაქტობრივად გზის არარსებობის გამო, კატასტროფის ადგილამდე მიღწევას ვერ ახერხებენ.

ხატია ლაღიძე