საპარლამენტო უმცირესობის წევრი როლანდ ახალაია პროკურატურის თანამშრომლის, ირაკლი ჩილინგარაშვილის წინააღმდეგ საჩივრის შეტანას აპირებს.

მისი თქმით, აღნიშნული პიროვნება მას ცილს სწამებდა გამოძალვაში და ამასთან დაკავშირებით არასწორ ინფორმაციას აწვდიდა საბერძნეთის სასამართლოს.

„პროკურატურის ერთ-ერთი განყოფილების გამგე პროკურატურის სახელით წერილს აგზავნის საბერძნეთის სასამართლოში, წერდა ტყუილებს, რომ ჩემი და ჩემი შვილის სამართლებრივი მდგომარეობა დამძიმებულიყო. კერძოდ, იქ უწერიათ, რომ მე ვაწარმოებდი გამოძალვას ვიღაც პირების მიმართ და ამას დადასტურებით უგზავნიან საბერძნეთის სასამართლოს. მე ეს დოკუმენტი ჩავაბარაე ადგილობრივ სასამართლოს. ეს ადამიანი არის ჩილინგარაშვილი“, - ამბობს ახალაია.

შეგახსენებთ, რამდენიმე წუთის წინ როლანდ ახალაია საქალაქო სასამართლომ უდანაშაულოდ ცნო. როლანდ ახალაიას ბრალდება წარდგენილი ჰქონდა სისხლის სამართლის კოდექსის 333-ე მუხლით - სამსახურებრივი უფლებამოსილების გადამეტების ორი ეპიზოდისთვის, რაც სასჯელის სახედ და ზომად ითვალისწინებდა თავისუფლების აღკვეთას სამ წლამდე ვადით.

ნინო დათაშვილი